"Governu halo koremetan tanba tauk Mauk Moruk nia klamar mai babeur sira hotu"

.

Oan Kiak

Horseik ha'u nia ulun moras tebes uainhira ha'u rona koalia asuntu deslutu nasional, ha'u seidauk hatene loloos saida mak sira hakarak halo, Rui Araujo dehan ba ita koremetan hodi hala'o dezenvolvimentu nasional, hateke ba oin, tau ita nia todan ba kotuk.

Ukun na'in sira koalia midar tebes kona ba desluto ka koremetan maibe oinsa mak koremetan nasional  bele hasai ita nia todan iha sosiedade ne'ebe laiha justisa, ema kiak barak, injustisa hasoru Maubere Oan kiik buras loron loron, ukun nain sira nafatin naok Maubere Oan  nia osan hodi fahe ba malu , millaun ba millaun que sira aprova ba OJE povu rona de'it mak millaun, benefisiu ita haree ho okulu mos la hetan, joven barak sei tur iha dalan ninin tanba servisu laiha, dezempregu aas tenbes, sira iha Governu fahe malu kadeira hanesa dadaun Rui fo'o prezente ba Emilia Pires, Rui ofrese knaar ida hanesan asesor internasional ho vensimentu $30, 000 amerika dolar fulan fulan. Ita kompara hela sira ho ita nia asuwain que funu tinan 24 no balun to'o ohin loron moris iha kiak nia le'et. Ho desluto nasional sira ba hasai todan saida? Sira nia todan rasik? Tanba lakohi fo'o ona onra ba ita nia istoria no ita nia funu nain sira, ka sira ema bulak no hanoin katak ho sira nia koremetan sira bele hasai todan duni hosi povu kiik. Kal sira hotu presiza ami kaer sira hotu no sulan sira iha ospital ida ba ema bulak no taka metin sira iha ne'eba hodi sira nunka mais haree loron sae iha sira nia moris tomak. Balun karik sulan de'it iha komarka tanba sira ema perigozu tebes ba ita nia estabilidade nasional.

Ha'u deskonfia tebes ho Rui Araújo (se mak bele fiar  Arnaldo Araujo nia oan?), tanba ba hala'o dezenvolvimentu nasional ita la presiza kore metan, la presiza tau ita nia matebian ka ita nia todan ba kotuk no haluha, tanba ita nia istoria mak halo ita ema brani, ita nia istoria mak fo korajen no inspirasaun ba ita la'o ba oin.Tuir ha'u nia hanoin koremetan ida ne'e traisaun bot ba ita hotu. Governantes sira halo koremetan hodi hakuak otonomista sira, hodi sama Maubere Oan nia terus, hodi haluha ita nia erois nia ruin que seidauk hetan, hodi fasi sira nia liman, governu ida ne'e aat liu Judas. 

Ha'u bilang  tebes no ha'u desidi ba vizita ha'u nia tiu katuas ida iha foho.Ha'u kaer kareta no ha'u ba to'o Viqueque.

Uainhira ha'u to'o iha Viqueque no to'o iha ha'u nia tiu nia uma, ha'u tiu mai hakoak ha'u no ho seriu nia dehan, ' Oan o mos hola parte iha koremetan nasional?", hau rei ha'u nia tio nia liman no dehan, lae pai, ha'u la'os ema traidor, mai ha'u seidauk to'o tempu hodi halo deslutu iha ita nasaun. Ideia ida ne'e Governu Arnaldo Araujo nia oan mak implementa, mai ha'u Arnaldo Araujo nia oan laiha folin hanesa primeiru-ministru, nia Xanana no Mari nia boneka, sira rua halimar ho nia tuir sira nia bontade, Ha'u nia tio hamnasa mai ha'u ho oin midar no ha'u nia tiu dehan, "Oan mai uma laran ha'u hakarak hateten istoria ida", ha'u kaer nia liman no ami la'o hamutuk ba uma laran.

Ha'u nia tiu tur iha rai no ha'u mos tur no nia dehan:

'Oan iha Dili ne'eba ukun na'in sira tauk tebes. Sira halo koremetan nasional la'os hodi haree povo kontente ka hodi halo dezenvolvimentu nasional. Sira bosok imi hotu. Ami iha foho sira hanoin ami beikteen maibe ami hatene tanba sa foin sira hakarak halo koremetan nasional. Karik sira hakarak di'ak ba ita nia rai, kleur ona ami hotu hetan moris di'ak oituan, sira la na'ok ami nia osan no sira la haree malu no fo'o servisu ba malu hanesan ita nia primeiru-ministro foin halo, fo'o servisu ida ba senora Emília Pires no ninia vensimentu bo'ot liu osan que ami hotu iha, iha ami distritu ida ne'e. Ami kiak tebes no dala barak ami la iha hahan kalan, ami nia kabun moras no ema barak barak hamalaha, labarik sira  mos hamalaha dala barak ami  hemu bee deít  hodi taka ami nia hamalaha. Sira kore metan la'os hodi  fo'o di'ak ba ami povo kiik'.

Ha'u hakfodak tebes uainhira ha'u rona ha'u nia tiu koalia politika no ha'u husu, tanba sa mak sira halo koremetan nasional pai?

'Oan, o hatene katak Maun Mauk Moruk governu mak haruka oho no sira oho nia ho kilat musan barak, ema ida hosi Viqueque, Watulari  rasik dehan mai ha'u  katak Mauk Mauk mate aat liu balada fuik, sira oho nia la to'o, sira sei kontinua tiru nia uainhira nia mate ona. Nia dehan katak iha kotuk ema ida mak fo'o orden ba ema ida  naran Eusebio hosi Viqueque, Watalari, hodi oho Maun Mauk, nia  dehan mai ha'u ha'u katak  ema ida iha  kotuk dehan, kilat musan ne'e halo hotu tiha, lalika husik ida hela iha kilat laran. Nia dehan katak tanba ida ne'e mak Maun Mauk iha kilat musan barak iha nia isin'.

Ha'u rona istoria ho tauk no ha'u admira tebes tanba ha'u nia tiu hatene barak no ha'u husu, pai ema iha kotuk naran sa? Ha'u nia tiu hirus tebes ha'u, ha'u nia tiu dehan, "Oan, o keta halimar ho ha'u o hatene se mak iha kotuk", ha'u nonok kedas, ha'u nia tiu tau sigaru iha nia ibun no nia koalia mesak, ha'u nonok hela.

'Oan, ema que hela iha kotuk no haruka oho Maun Mauk nia dadaun nia kalsa boradu ho te ben tanba nia tauk Maun Mauk nia klamar sei babeur nia, ema que hela iha kotuk tauk tebes, nia toba la dukur, tur la metin, tuir ha'u nia hanoin nia sei hetan atakasaun iha fuan iha tempu badak, nia sei tuir Maun Mauk nia ain fatin'.

Ha'u hakarak husu dala ida tan ema nia naran que hela iha kotuk no haruka oho Pai Mauk Moruk maibe ha'u tauk ha'u nia tio, ha'u ema bot ona maibe nia sei bele kaer ai pedasuk ida no baku mate ha'u karik tiu hanoin katak ha'u halimar ho nia, ne'ebe ha'u nonok de'it maibe hau hanoin hela, se mak ema iha Eusebio nia kotuk que haruka oho Pai Mauk?

'Oan, ha'u karik ema que hela iha kotuk no haruka oho Maun Mauk ha'u mos tauk. Imi iha Dili rona saida mak akontese ba matadalan que hatudu forsa Maun Mauk nia subar fatin? Loron ida hafoin Eusebio hosi suku Watalari oho Maun Mauk, matadalan ida ne'e tara kedas nia aan. Karik Maun Mauk mak babeur ona nia. Ha'u fiar ema balun sei tuir matadalan nia nasib iha tempu badak'.

Ha'u hateke ba ha'u nia tiu ho orgullu bot tebes, rona ha'u nia tio ha'u rona notisias diak liu RTTL ka TVTL, katuas hatene barak los kona ba Pai Mauk nia mate, ha'u triste tanba ha'u seidauk iha hanoin ema se mak iha Eusebio nia kotuk que haruka oho Pai Mauk.

'O hatene se mak ba Venilale loron balun liu ba? Nia, ema que  hela iha kotuk no haruka Eusebio oho Maun Mauk. Nia ba ho ema balun, ha'u rona que ema que hela iha Eusebio nia kotuk no haruka oho Maun Mauk nia lori nia matandook. Nia ba Venilale, ba fatin akontesimentu Maun Mauk mate hodi hamulak, hamulak hodi hamos nia sala para Maun matebian nia klamar keta tuir no babeur nia. Ohin loron ema que hela iha kotuk no haruka oho Maun Matebian nia tauk loron kalan, nia hatene katak nia laiha salvasaun ona, Maun Matebian sei babeur nia no sei lori nia, nia sei selu karun tebes nia orden ba Eusebio hodi oho Maun Matebian. Iha tempu badak nia ba komesa haree Maun Matebian iha fatin hotu hotu, iha nia uma laran, iha nia kareta, iha nia kantor, nia halai ba ne'ebe? Maun Matebian sei halo nia hetan moras fuan ida no nia sei la aguenta...'

Ho tauk ha'u husu, Pai hau seidauk hatene ema se que  hela iha kotuk no haruka oho Pai Mauk Moruk. Katuas ho hirus no lian makaas dehan, 'Orsida hau tau ona o oan. Ema ne'e que hela iha kotuk no haruka oho Maun Matebian ema ida que ha'u dehan ba o hela dook hosi nia iha Dili, laos primeira vez que nia haruka oho ema FALINTIL nian, o haluha ona saida mak ha'u konta ona ba o? Oan o halo ha'u hirus o tebes. Oan o mangame ha'u?  Ema que haruka oho Maun Matebian sei iha naran seluk hodi nia hela iha kotuk no haruka oho, ne'ebe o ba Dili no keta hatudu oin brani, nonok de'it oan, ha'u lakohi lakon tan o hanesa ha'u lakon o nia aman no ho nia Maun.Ita nia familia lakon barak ona'.

Ha'u hateke ba ha'u nia tio no ha'u nia mataween monu, ha'u hanoin fali ha'u nia aman doben.Foin ha'u hatene kedas ema se mak hela iha kotuk no haruka Eusebio oho Pai Mauk. Ha'u hatene no ema barak mos hatene katak nia mak fo'o duni orden hodi oho Pai, nia sei hetan kastigu todan ida iha tempu badak, Pai Mauk sei la deskansa iha Lalehan uainhira ema que haruka oho nia iha kotuk sei moris, Pai sei mai foti nia iha tempu badak, nia sei hetan moras bot ida no buka salvasaun la hetan. Ami hotu hein ida ne'e.Ema que hela iha kotuk no haruka oho Pai merese kastigu todan duni, nia sei hetan iha tempu badak. 

'O ba Dili lalika halo politika oan, halo o nia servisu no tur hakmatek iha uma laran oan, tanba governu ida ne'e ema mesak milisi mak ukun ita, Arnaldo Araujo nia oan mak lidera milisi sira ne'e, o sei lembra Arnaldo saida mak ha'u konta kona ba Arnaldo Araujo? Arnaldo Araujo ema traidor boot liu iha ita nia rain, nia trai Timor-Leste laos dala ida de'it, hau sei hanoin katak nia mos trai Timor iha tempu funu Japones nian, iha funu hasoru Japones, Arnaldo Araujo trai Timor no nia  funu hasoru Timor hamutuk ho Japones sira, Indonesia mai funu Timor, nia funu hasoru Timor ho TNI sira, Arnaldo pior liu asu fuik ida, ema koruptu los. Nia oan nia governu hamutuk ho ema que o hatene ona haruka oho Maun Matebian no ema nain tolu tan. Sira oho o nia primu nain tolu tanba sira nain tolu ema que la trai Maun Matebian. Maun Matebian sei hakilar ba sira nain tolu 'halai' maibe uainhira sira haree Maun Matebian simu tiru entaun sira nain tolu fila mai hakoak Maun Matebian hodi fo'o isin lolon ba ema tiru no tanba sira la trai Maun Matebian sira mate hamutuk ho Maun Matebian. Sira foin halo koremetan nasional tanba sira tauk tebes Maun Matebian mai babeur sira hotu, laos tanba hakarak hasai todan no terus hosi povu, sira halo koremetan tanba sira tauk Maun Matebian nia klamar. Oan, o rona ha'u didiak, ohin loron ita nia rain ema milisi traidor, naokten, oportunista no ohodor mak ukun ita, ita labele halo buat ida, ita harohan de'it ba Maromak no ita nia Matebian hodi fo'o tulun ba ita hotu no husu sira ba halo justisa ba ita hotu no husu mos ba babeur sira hotu. Koremetan ida ne'e sira halo hodi sira fase sira nia liman ba povu nia terus no nafatin naok, oho no ukun ho hanoin krimininozu. Sira nia koremetan nakonu ho pekadu, hanoin aat ba povu no ba fase lalais povu nia ran lulik. Oan, o lalika hanoin tan sira nia koremetan tanba Maromak sei kastiga o. Sedu liu hodi halo korementan nasional. Oan, o ba husu ba Arnaldo Araujo nia oan: Nia no nia kaben mos ba hasai sira nia lutu, sira la ba hatais ona metan ka sira sei onra sira nia familia matebian no povu de'it mak tenke koremetan,o ba Dili no husu tok Arnaldo Araujo nia oan. Governu halo koremetan nasional tanba tauk Maun Matebian mai babeur sira hotu".

Ha'u nia tiu nonok  no ha'u mos tur  nonok no hanoin mes mesak. Ema que hela iha  kotuk no fo orden hodi Eusebio hosi Viqueque, Watalari oho Pai Mauk hakarak  haruka oho tan se?

Bele lee tan: Desluto não! Luto sim! Pelo assassinato de antigos companheiros de luta.

.