EVA SEMPRE SALA!

,

Maktuik: Sita Kehi (Juzito Rebelo)  - Dili, Timor Leste, 18 de Setembro de 2015

Adaun hán tiha aifuan nebé Maromak bandu. Tambasá? Ah...! Tamba Eva mak fó. Eva mak sala?  

Adaun ho Eva nia oan halo sala, ema hakilar “inan la’ ukun!” Eva mak sala, tamba Eva mak inan? 

Wainhira hirus buat ruma, ema haksu’uk “filha da puta pa!” Ah...! Eva mak puta, tamba Eva mak hahoris?

.   

Ministru ka deputadu Adaun kamarua ho Eva no ema dehan “Eva matan naklosu bá sira nia osan!”

Sé Frater Adaun la’ iha vokasaun atu sai padre, ema halo konklusaun “Eva mak babeur!”    

Padre Adaun mak halo Eva isin rua tiha, Maibé ema kondena “Eva mak diabu nebé babeur nailulik!” 

Adaun kamarua ho Eva seluk; maibé Adaun nia fén haklelek “Eva feto manas mak hadau ha’u nia la’en!”  

,

Hori otas ba otas, Eva sempre sala! 

Adaun bele toba ho Eva barak no ema dehan “mane ne’e normal!” Maibé sé Eva halo hanesan Senhor Adaun, ema dehan “Eva ne’e feto manas, feto karlele!”   

.

Tambasá mak Eva sempre sala? Keta tamba ema barak simu ona no sei fiar nafatin karik, katak Eva nia destinu mak nune’e? Katak Eva mak diabu nebé gosta babeur Adaun sira? Katak atu sai nudár mane lolós, Adaun tenki toba ho Eva barak? Katak Eva nia kakutak sei mamuk tebes hodi fó dalan bá ministru eh deputadu Adaun bele habosok ho osan? Katak frater eh padre Adaun mane kmók no sala laek nanu’u Anju sira iha lalehan?   

.   

Wainhira mak ó loke matan no kakutak hodi haré no hanoin buat lolós? Wainhira tan mak ó sei loke ibun hodi hakilar katak Adaun mos bele sai mane manas; katak Adaun mos diabu nebé hatene babeur; katak Adaun mos kakutak mamuk nebé lanu ho osan?   

.