Emilia Pires nia primo sai asesor PM nian no simu $11, 611,11 amerika dolar

.

Oan Kiak

Semana balun liu ba sai polemika boot salariu Emilia Pires hanesan asesor iha Primeiru Ministru nia gabinete no hau foin simu notisia katak iha gabinete PM nian Emilia nia primu mos sai asesor no simu osan barak.

Ha'u laiha buat ida hasoru senor Emanuel maibe interesante ita haree katak Rui dehan katak hakarak halo poupansa uainhira nia simu pose maibe ninia asesor sira mesak simu osan boot no sira ema timor-oan. Ha'u la hatene legal ka ilegal sira nia kontratu, maibe tuir hau nia hanoin bele la ilegal maibe imoral. Imoral tanba Maubere Oan sira meioria susar han loron ida dala tolu, labarik sira sei la ba eskola tamba inan no aman presiza sira hodi servisu hodi ajuda sira. Salariu asesor sira sei sai hanesan amiasa ba Maubere Oan nia moris. Karik ida ne'e Maubere Oan nia malisan duni.

Tuir tabela iha leten, ita bele haree katak iha Gabinete Primeiru Ministru nian eis Ministra Finanças nia primu, Emanuel A. de Araújo Braz, sai top asesor ba PM no ninia salariu boot liu ema hotu hotu iha PM nia gabinete.

Ha'u la dehan katak senõr Emainuel laiha kompetensia atu sai asesor ka la merece salariu boot ida ne'e. Ha'u hatene katak senõr Emanuel halao ninia estudus iha Melbourne, Austrália ne'eba, no karik merece duni sai asesor.

Maibe ha'u nia perguntas ba ita nia primeiru ministru mak hanesa tuir mai:

Ita nia povu sei moris iha kiak no susar nia laran no senor Primeiru Minustru uainhira simu pose dehan katak  ita nia prioridade mak halo poupansa, maibe PM ninia hahalok hatudu seluk. Uainhira ukun na'in ko'alia poupansa, poupansa saida? Poupansa iha dezenvolvimento, poupansa iha saude, poupansa iha edukasaun?

Ukun na'in ko'alia poupansa, maibe poupansa ida ne'ebe? Antaun hahú lae ho imi nia asesor sira no iha imi nia gastus. Ita nia povu sei la hetan moris diak no ita tenki selu timor-oan ida dolar rihun ba rihun? Tan de'it sira mai husi rai liur? Tan de'it sira hetan estudus iha rai liur no uainhira fila ba ita nia rain tenke sai kedas ema boot, tenke susu ami nia ran, ami nia terus, ami nia susar?

Maubere Oan barak mos hakarak hetan edukasaun, hakarak mos ba estuda iha rai liur, hakarak mos sai sidadaun satu iha Maubere Oan nia rain. Maibe uainhira mak mehi ida ne'e bele akontese? Bele akontese de'it uainhira ita hapara fo'o oportunidade di'ak sira ba ema ke mai hosi rai liur, uainhira governu investi makas iha edukasaun no saude no hapara hahalok aat hanesan selu asesor sira osan boot, osan selu asesor sira Maubere Oan nia osan, Maubere Oan nia ran no ruin.

Timor-oan hotu-hotu tenke foo ninia kontribuisaun hodi dezenvolve ita nia rai no tuir hau nia hanoin tenke hahú kedas ho redusaun salariu hosi ita nia asesor sira, nasional ka internasional.

Ita labele kontinua halo injustisa iha Maubere Oan nia leet, uainhira mak ukun na'in sira para sama povu ida ne'e? Uainhiri mak imi para estraga Maubere Oan nia osan no gasta saugati hanesan osan imi nian?

Asu han ona imi nia moe ka?

.