Akademiku Sei Halo Asaun Pasifiku – Alkaitri: Lei Pensaun Vitalisia Iha PN

.

Jornal Nacional Diário - 21 de setembro de 2015

Associação Academico Estudante (AAE) Timor Leste, ne’ebe kompostu husi estudantes universitariu sira hotu iha Timor laran tomak, sei mobiliza malu halo asaun pasifiku iha Dili wainhira Parlamentu Nasional (PN) la tau importansia ba sira nia ejijensia hodi halo lalais revizaun ba lei pensaun vitalisia.

Manifestasaun pasifiku ne’e sei halo iha Tersa (22/9/2015), kuandu PN la seriu hodi responde atu halo revizaun ba lei pensaun vitalisia ne’ebe habokur deit eis titulares sira (eis membru PN ho eis membru Governu).

Senadu Universidade Nasional Timor Lorosae (UNTL) Faustino Soares hatete, sira ejije liu mak atu halo lalais alterasaun ba lei no 1/2007 konaba lei pensaun vitalisia nian i proposta ne’ebe mak sira fo ba orgaun soberanu sira, liu liu PN atu diskute iha durasaun tempu semana ida, maibe karik sira hein to’o Tersa semana oin mak la iha resposta mak sira sei organiza malu hodi halo greve.

‘’Konserteza ami tenki lao tuir mai nia komunikadu imprensa ne’ebe mak foin lalais fo sai ba media katak sei halo asaun pasifiku hasoru Esatdu hodi defende povu nia lian, maibe antes atu halo greve ami sei haruka karta rekunesementu ba uluk polisi,” informa Faustino Soares ba Jornalista sira iha Kampus UNTL, Sesta (18/09/2015).

Faustino hatete, hanesan akademiku konsidera tempu to’o ona halo alterasaun ba lei pensaun vitalisia ne’e, tanba besik dekade ida ona entidade hotu-hotu preokupa kona ba pensaun vitalisia, maibe ukun nain sira halo vinze la rona tiha aspirasaun povu nian.

‘’Ne’e ultimu ne’ebe mak ami halo, entaun ami tenki halo manifestasaun atu nune’e bele representa povu lian laek sira, tanba se laos ami se tan ami atu aspira povu kik sira nia lian,” afirma Faustino.

Iha fatin hanesan Ramoe Verdial hanesan alumni estudante UNTL hatete, tempu ona ba orgaun soberanu liu liu parlamentu nasional halo ona alterasaun ba lei No 1/2007 konaba pensaun vitalísia.

“Ita nudar Timor oan hakarak buat hotu lao ho diak no kombina ho justisa sosial, distribuisaun produtu nasional nian ne’e ba povu tomak tenki hanesan tuir ita nia Konstituisaun,” Romeo hateten.

Iha PN Nia Liman

Hatan ba aspirasaun povu nian ho estudantes universitariu sira nian kona-ba halo revizaun lalais ba lei pensaun vitalisia ne’e, Mari Alkatiri nudar eis titulares no Sekretariu Jeral partidu FRETILIN, esklarese katak xavi ba halo revizaun lei pensaun vitalisia la’os iha FRETILIN, maibe iha parlamentu nia liman.

“Parlamentu maka halo lei no momentu lei ne’e mosu hau la asumi ona kargu hanesan Primeiru Ministru,”hateten Mari Alkatiri ba jornalista sira iha Ministeriu Negosiu Estranjeirus no Kooperasaun (MNEK).

Nudar Sekretariu Jeral FRETILIN Mari Alkaitri afirma katak, FRETILIN nudar bankada ki’ik ida iha PN la bele halo buat ida, mas Bankada FRETILIN hato’o ona proposta ba meja PN hodi halo revizaun ba lei pensaun vitalisia, maibe depende ba nai ulun sira iha PN maka bele tau ba ajenda.

“Atu desidi semak bele simu pensaun vitalisia i se mak la bele simu ne’e kompetensia Governu nian i hau la bele koalia barak selae ema dehan hakarak hau mak simu deit lakoi fo ba ema seluk,” hateten Mari Alkatiri. nia/ita

.