RUI ARAUJO SAI MALISAN BOT BA TIMOR-LESTE

.

Opiniaun: Oan Kiak

Ohin loron bot ba ita nia rai doben Timor-Leste maibe sai fali loron lutu no triste ba veteranus no luta nain sira, tanba naran bot FALINTIL kahur ona ho ran. Luta nain ida rasik que harii FALINTIL no kaer bandeira FALINTIL nian hodi luta hasoru Indonezia sai vitima hosi hahalok no kilat musan FALINTIL nian.

Iha Loron Falintil tinan 2015 primeira vez que ami veteranus la konsegue komemora ita nia loron ho hakmatek, orgullo tanba ita nia Aman nain rua sai vitima FALINTIL nian, Pai Mauk mate ho kilat musan 47 RDTL nian no ita nia Pai L7 iha terus bot iha ninia fuan. Pai L7 luta hamutuk ho sira seluk hodi rai lulik Timor Loro Sae hetan independensia, nasaun ida ne'e no ita nia ukun nain sira haluha tiha ona Pai L nia kontribuisaun no ukun nain rasik mak fo lutu ba Pai L7 no Pai nia familia hodi sira komemora Loron FALINTIL ba dala 40.

Ita bele fo sala ba FALINTIL ka lae? Tuir ha'u nia hanoin FALINTIL hanesan instituisaun la sala, Xanana, Governu Rui Araujo nian no Parlamento Nasional mak iha ran iha sira nia liman, laos ita nia FALINTIL.

Ita hanoin lae didiak Timor Loro Sae historia funu nian no ita bele foti konkluzaun katak Timor-Leste monu iha malisan nia laran uainhira Rui Araujo lidera Governu Timor-Leste tanba nia mai hosi familia otonomista, familia que haruka oho Maubere Oan barak, Arnaldo Araujo, Rui nia aman rasik lidera masakre Aitana nian ho TNI sira hodi oho Maubere Oan inosente barak. Masakre Aitana mak masakre bot liu masakre seluk iha ita nia rai, iha masakre ne'e Maubere Oan rihun ba rihun mate, Arnaldo Araujo mak hamutuk ho  TNI hodi oho inosente Maubere Oan sira.  Ita hotu bele dehan katak laos Rui Araujo nia sala, tanba nia labele simu todan hosi nia aman kriminozu halo.

Los duni maibe Rui nia hahalok mos rezulta Maubere Oan mate, nia Governu mos haruka oho Maubere Oan, hanesa nia aman, Rui Araujo mos iha ran iha nia liman hanesa nia aman, Rui mos haruka oho Maubere Oan, hanesa nia Aman Rui mos haruka fakar ran iha ita nia rai lulik nia leet.

Laos foin mak ita haree katak Rui Araujo iha problema ho veteranu sira, fulan balun liu ba, Rui Araujo la husik Pai L7 halo manifestasaun pasifiku ida no ameasa Pai L ho polisia no forsa karik Pai L halo manifestasaun. Rui Araujo la hanoin katak nia ohin loron tur iha Governu hanesa PM tanba ami veteranu. Tanba ema hanesa Pai Mauk Moruk no Pai L mak nia ohin loron bele komemora Loron Falintil no halo diskursu tun sae ho nia maluk traidor sira, hodi habosok povu FALINTIL nia historia no bosok fali katak nia no ninia maluk mak luta mesak, sira mak sai heroi Timor Loro Sae nian no sira mak nain ba Timor Loro Sae no karik ema la konkorda ho sira nia hanoin, sira haruka oho ka halo tortura.

Ha'u nia kakutak la konsegue rasionaliza hahalok kriminozu  Rui nian hodi fo orden hodi hakotu Pai Mauk no nia membru nia moris ho dezumanu no brutalidade hanesa sira halo maibe ha'u hatene de'it katak ida ne'e malisan ida tanba povu la hili Rui ba tur iha Primeiru-Ministru nia kadeira, hanesa uluk povu la hili Arnaldo Araujo hodi sai Timor Loro Sae indonezia nia administrador. Aman no oan ukun Timor Loro Sae tanba ema seluk hili sira laos Maubere Oan mak hili sira.

Aman Arnaldo Araujo  ukun Timor Loro Sae no ran fakar ho dezumanu no brutalidade, oan Rui Araujo ukun Timor-Leste no Maubere Oan ran sei fakar ho dezumanu no brutalidade.Ida ne'e malisan duni.
.

Ita nia matebian hirus ita tanba Timor-Leste ema traidor no ohodor nia oan labele ukun ita, tanba sira laiha domin ba ita nia rai lulik, sira nunka terus hamutuk ho ita iha funu nia tempu, ne'ebe sira que mai hosi famillia que oho Maubere Oan nunka ba ukun ho hakmatek, nunka ba ukun iha pas nia laran tanba ita nia matebian babeur ona sira, uainhira ema hanesa Rui ukun ita, Maubere Oan la hetan moris di'ak nomos la hetan pas ka estabivilidade tanba ema hanesa Rui Araujo sira malisan bot ba Timor-Leste.

Rui Araujo horiseik ba partisipa misa omenagem ba herois libertasaun nasional no ha'u hanoin ha'u nia aman no maun que indoneziu sira halo tortura no oho, saida lolos mak hau nia Aman no Maun ke agora  iha Maromak nia sorin hanoin? Hanoin ita hotu goza sira, hanoin ita laiha respeitu liu ba Maubere Oan que mate nomos sira nia familia, tanba ema ida que nia aman rasik haruka oho iha Masakre Aitana Maubere Oan mak ohin loron mak halo diskursu iha ita nia matebian nia loron, ema nia oan que oho Maubere Oan mak iha Governu nia oin mak desidi Maubere Oan nia destinu. Ita nia matebian la simu realidade ida ne'e no sei fo malisan ba ita hotu.

Arnaldo Araujo nia oan labele kontinua ukun ita, labele desidi Maubere Oan nia destinu. Maubere Oan labele fo fiar ba ema traidor nia oan hodi ukun ita tanba ita hotu sei simu malisan bot hosi ita nia heroi sira que mate ba ita nia independensia lulik.

Rui Araujo malisan bot ba Maubere Oan hotu no uainhira nia ukun ita sei fakar ran, ita sei odiu malu, ita sei mate tanba ema traidor no ohodor nia oan sai malisan bot ba ita. 

Loke matan Maubere Oan, hader Maubere Oan, ita mak luta hotu hamutuk hodi sosa ita nia independensia ho ran no ruin ne'ebe ita labele fo tan permisaun ba ema traidor ukun ita.

VIVA FALINTIL!

VIVA MAUBERE OAN!

VIVA TIMOR-LESTE!
.