MAUK MORUK MATE HO MEMBRU NAIN TOLU

.

Timor Post - 08 de agosto de 2015

DILI-Informasaun Provisoriu, Ohin, Sabdu (8/08) mais menus tuku 16.00 otl, mosu atentadu entre grupu MM ho EOC iha area Watu Saha Loi, Aldeia Uai Talibu, suku Uatu Haco, Posto Venilale, Munisipiu Baucau. iha atentadu ne'e EOC hamate MM ho nia membru nai'n 3,  entertantu MM nia membru ne’ebe sei moris no subar oras ne'e EOC kontinua serka atu kaptura.

Antes ne’e, Administrador Sub-Distritu Venelale Júlio Tome fó sasin, atentadu Mauk Moruk iha Postu Venilale, tuir fó sasin sira katak, iha atentadu Kinta (06/08) deskonfia lider Konsellu Revolusaun Maubere (KRM) Mauk Moruk hetan kanek.

“Tarjetu forsa nian iha atentadu ne’e maka Mauk Moruk de’it, no tuir sasin sira haree iha fatin akontesementu katak, konsege tiru kona Mauk Moruk to’o monu, depois maka Mauk hamri’ik fali hodi kontinua tiru no halai,” Administrador Júlio Tome haktuir ba Timor Post, via telephone, Sesta (7/08).

Tuir Administrador posto Venilale, Júlio Tome da Silva katak, iha atentadu ne’e, komunidade sira ne’ebé hamutuk ho forsa halo invuskada ba Mauk Moruk ne’e haree kedas forsa estadu nian konsege hakanek Mauk Moruk.

Maibé, hafoin atentadu, komunidade sira la preokupa ona atu buka tuir Mauk Moruk, maibé sira buka atu salva uluk maka forsa na’in rua ne’ebé kanek ne’e.

No lakonsege la’o tuir Mauk Moruk sira nia ain fatin atu haree ran. No ohin (Sesta-red) maka forsa hamutuk ho komunidade sira la’o tuir fatin hetan duni ran fakar tutuir dalan iha area Wai Su’uli nian, ne’e Mauk nia ran, tanba iha momentu atentadu ne’e tarjetu forsa nian maka Mauk, no konsege monu, no ida ne’e posibilidade Mauk nia ran,” administradór Júlio dehan tuir.

Iha fatin hanesan, Polisia Nasionál Timor-Leste (PNTL) eskuadra Posto Administrativu Venilale, Munisípiu Baucau aumenta, iha loron Kinta (6/08) mais menus tuku 13H00 meudia otl, halo kapturasaun ba membru grupu Konsellu Revolusaun Maubere (KRM) hamutuk na’in tolu iha area Hasa La’e Tula, fronteira entre Venilale no Posto Administrativu Ossu, Munisípiu Viqueque.

Kapturasaun ba membru KRM na’in 3 akontese, bainhira komunidade sira hato’o informasaun ba parte Polisia katak Mauk Moruk hamutuk ho nia grupu la’o lahatene ba lós ne’ebé fahe malu iha fatin tolu.

Grupu ida la’o hosi suku Lia Ruka, posto Ossu, munisípiu Viqueque no grupu ida la’o hosi diresaun Kai Wa Hu aldeia Kaitia, suku Fatulia, Posto Venilale.

Grupu ne’ebé la’o iha suku Lia Ruka kompostu hosi ema na’in 10 resin. Iha grupu ne’ebé la’o iha parte Hasa Lae Tula hamutuk ema na’in 12 no na’in 9 la’o liu, na’in 3 seluk la’o sala dalan, tanba ne’e komunidade hetan no hato’o informasaun ba polisia.

Entertantu, grupu ida ne’ebé la’o hosi diresaun Kaitia ne’e hamutuk ema na’in 5, inklui Mauk Moruk no matebian Domingos Soares.

Hafoin halo kapturasaun, autoridade seguransa sira lori kedas membru KRM na’in 3 ne’e ba iha eskuadra Polisia nian.

Depois ida ne’e maka dezenvolve tan informasaun, katak iha grupu rua maka sei iha, no buka tuir.

Nune’e mós komunidade ho inisial MR hatete, iha loron Kinta dader mais menus tuku 05H00 madrugada otl, nia atu ba haree kuda iha natar, maibé to’o iha dalan klaran nia leno lampra no hetan Mauk Moruk ho nia membru na’in 4.

Iha sira nia dada lia, MR konta, Mauk Moruk husu ba nia atu hamate lampra, maibé nia lakohi tanba tauk.

“Hetan sira ha’u koñese kedas ona Mauk Moruk, entaun sira ameasa ha’u no husu hamate tiha lampra ne’e, maibé ha’u lakohi tanba sira ho sasan kroat hanesan tudik no pistola. No Mauk Moruk dehan sira ne’e forsa armada, tanba ne’e labele tauk, maibé ha’u hatene ona katak nia Mauk Moruk, depois sira dehan forsa halo kontrola, maibé ha’u la fiar, ne’e maka ami kontinua ko’alia no ikus mai Mauk Moruk fó nia nomor kontaktu ba ha’u,” MR fó sasin.

Hodi dehan tan Depois hasoru malu, MR fila mai Kaitia hodi hato’o ba komunidade sira katak nia hetan MM tanba ne’e tenke hato’o informasaun ba polisia.

No komunidade balun kontinua ba hafuhu tuir sira la’o ba ne’ebé, no balun informa polisia.

No iha momentu ne’e, iha duni membru Polisia ho naran Nelson Carlos Amaral no Gau Terus (F-FDTL) mai no halo kontaktu ho Mauk Moruk.

Iha kontaktu ne’e, Mauk Moruk ho forsa na’in rua ne’e dada lia durante minutu 30 liu.

Hakfodak hetan malu ona, kuaze metru 5 ka 10 de’it. depois forsa na’in rua ne’e husu sira atu rende, entaun membru KRM ida mai rende no toba tiha iha rai, mas depois forsa atu ba husu Mauk rende, Mauk so’e kedas Granada, entaun forsa na’in rua ne’e so’e án tama ba aú laran, kontinua kedas Mauk tiru sira na’in rua.

Hafoin atentadu, Mauk Moruk ho nia membru na’in 3 kontinua halai ba ai laran no husik hela mate isin Domingos, inklui sasan sira hanesan HT 3, pasta, no botas.

“Ami serku duni sira, mas labele halo buat ida tanba ami liman mamuk no sira uza sasan kroat. Ami só ba ajuda forsa ne’ebé kanek todan ne’e. sira halai no lori ho pistola 2 nomos iha pasta ne’e sei iha Granada,” MR haktuir tan.(Ekipa Timor Post)

  .