Mandadu Detensaun Ba MM Sei Ejiste – EOK La Retira

.

Jornal Nacional Diário - 04 de agosto de 2015

Mandadu detensaun ne’ebe maka Ministeriu Publiku (MP) aplika ba Prezidenti Conselho Revolusaun Maubere (KRM), Paulino Gama “Mauk Moruk” sei ejiste.

“Hau hanoin buat rua   ne’ebe mak difrente ita labele kahur buat rua, ita la tein batar da’an, entaun mandatu detensaun iha nafatin, pur enkuantu nia pasa hotu ita husu para prolonga tan madadu detensaun,” hateten Prokurado Jeral Republika (PJR), Jose Ximenes, hodi responde jornalista iha Palacio Presidensia, Segunda (03/08/2015).

Iha loron hirak liu ba publiku hakfodak rona dehan katak, Mauk Moruk entrega an ona ba Komando Empenhamentu Operasuan Konjunta (EOK) iha area entre Posto Administrativu Vemasse (Baucau) ho Munisipiu Manatuto. Maibe, informasuan ne’e, dezmente kedas husi XEfi Estadu Maior F-FDTL, Maijor Jeneral, Lere Anan Timur.

Informasaun ne’ebe Prezidenti Republika (PR), Taur Matan Ruak, tatoli ba komunidade sira liu husi dialogu komunitaria ho komunidade sira iha Munisipiu Lautem, foin lalais ne’e, katak, iha ona sinal husi Mauk Moruk dehan, nia hakarak entrega an ba Estadu iha loron aniversariu FALINTIL, 20 Agusto 2015.

EOK Lá Retira

Iha sorin seluk Segundu Komandante Polisia Nasional Timor Leste (PNTL), nudar mos komandante Jeral Interinu, Komisariu Faustino da Costa, informa, forsa Empeñamentu Operasaun Konjunta (EOK) kompostu husi Falintil – Forsa Defesa Timor Leste (F-FDTL) no Polisia Nasional Timor Leste(PNTL) seidauk retira husi tereinu iha parte Leste.

“Lae, la..e, atu dehan deit forsa konjunto ne’e laos retira, ne’e nafatin lao hela, nafatin lao hela, tanba ne’e mak ita trasa ona katak estratejia saida mak ita uja fila fali, liga ho informasoens bar-barak nebe que hateten katak dia 20 Mauk Moruk sei intrega-an,” afirma, Komisariu Faustino da Costa, ba Jornalista sira iha nia knar fatin, Kuartel Jeral PNTL, Kaikoli, Dili, Segunda(03/08/2015). Hodi responde tuir informasaun nebe dehan EOK retira ona husi parte leste.

Nia reforsa, operasaun konjunta kontinua lao, sei la retira operasaun maibe, antisipa sei karik Mauk Moruk intrega án antes dia 20 fulan Agustus ne’e diak liutan, i forsa sei la retira, sei halo mos esforsu detekta lalais hodi atinji objetivu operasaun.

Hatan mos konaba, garante ka lae senor Mauk Moruk sei intrega án iha 20 Agusto, Faustino nia parte la garante katak Mauk Moruk sei intrega án iha loron refere, maibe ne’e depende husi parte hotu-hotu.

Maske nune’e, Faustino dehan, Mauk Moruk intrega án kontinua submete ba justisa hanesan akompana nebe mak durante ne’e kazu hira mak iha hela, hodi automatikmente sei intrega ba Justisa.

“Sei nia intrega án la prosesu ne’e lae, ita hotu-hotu akompaña durante ne;e iha kazu hira mak iha hela, sei intrega án ou liu husi kapturasaun konjunto automatikamente sei intrega ba, nain do prosesu,” Faustino haktuir.

Nia parte rekoeñese, ate agora seidauk detekta paradeiru no forsa konjunta kontinua akompaña nafatin movimentu Mauk Moruk nudar alvu prinsipal.

“Hau hanoin atu detekta, la detekta, hau sei lakoalia katak ami detekta ona, fiksu ona ka lae, maibe ita nia forsa konjunta ne’e akompaña hela movimentu alvu prinsipal,” informa Faustino.

Nia informa mos katak, situasaun jeral iha distritu Baucau lao normal liu – liu iha kapital Munisipiu nian, maibe sei iha limitasaun liu-liu ba transposrtes publikus.

“Situasaun Baucau oras ne’e normal, dala barak ita rona informasoens lubuk ida, mais realidade hau dehan la nune’e, populasaun sira liu-liu kapital munisipiu iha hela movimentu bai-bain, so que iha limitasoens ba saida ruma liu – liu transporte publiko,” nia hatete.

Nia reforsa katak, limitasaun ba transporte publiko laos bandu, maibe husu para kopera, oinsa ekipa konjunta nebe mak halao servisu iha parte Leste bele lao diak liu-liu iha tempu kalan, tanba objetivu husi operasaun ne’e seidauk atinji rejultadu.

Iha parte seluk, Cornelio Gama ‘L7’ afirma, sei intrega problema Mauk Moruk ba nai ulun sira para buka solusaun, tanba nia parte laiha kbi’it atu kontra Mauk Moruk.

“Dialogu husi nebe- nebe prontu nudar maun hau sei intrega ba nai ulun sira, para nai ulun sira para bele atu koalia, tanba hau hanesan ema ida que, maun duni kbi’it laiha atu kontra Mauk Moruk hau bele koalia rihun ida mos la rona, hau bele koalia mos Prezidenti Republik mos la rona,” hatete, L-7, ba jornalista iha hela fatin, Bidau mota klaran, Dili.

L-7 kontenti simu ho liman rua, Prezidenti Republika kontaktu ona Mauk Moruk. “Ida ne’e hanesan hau koalia konaba Prezidenti kontaktu ona Mauk Moruk ne’e sorti ona ba ita hotu, mais Mauk Moruk nia hanoin oinsa, tanba ida Prezidenti da Republika, ida bolu hanesan veteranus funu nian, nebe sira iha ona ideas komum ou konjunto ita hotu basa liman,” dehan L-7.

L7 hatete katak, nudar relasaun hanesan maun seidauk iha kontaktu ho Mauk Moruk to agora, Uluk iha tempu funu nian Prezidenti Republik Nia (Mauk Moruk,red) soldadu, komu agora sae nudar Prezidenti depende Prezidenti nian hanoin atu bele kontaktu Mauk Moruk bele kontaktu, bele halo, nudar familia, Timor Leste ita hotu – hotu kontenti. avi/eus

.