Lemorai Lori AK 47 no Pistola - Kronolojia MM nia Mate

.

Timor Post - 10 de agosto de 2015

DÍLI—Membru grupu Konsellu Revolusaun Maubere (KRM) ho naran Lemorai ne’ebé kanek todan tanba hetan tiru hosi Empeñamentu Operasaun Konjunta (EOK) oras ne’e kontinua halai ho kilat AK 47 ida, pistola ida no diskonfia iha mós granada.

Atentadu entre grupu Mauk Moruk ho EOK iha Kinta, (6/8) ne’ebé akontese iha area Kai Wa Hu, aldeia Kaitia, suku Fatulia, posto Venilale, munisípiu Baucau rezulta membru EOK rua kanek (Nelson Carlos Amaral no Gau Terus) inklui hamate membru KRM ida ho naran Domingos Soares.

Tuir sasin ne’ebé diariu ne’e intervista iha Díli haktuir, hosi akontesementu ne’e, MM mos hetan kanek maske kontinua halai ba ai-laran. Ho kondisaun kanek hafoin hetan tiru, ran MM kontinua sulin tuir dalan hosi Kai Wa Hu, Wai Su’uli no lakon de’it iha area Taha Masi.

Sasin iha atentadu ne’e bainhira dada-lia ho jornalista Timor Post iha nia rezidensia Díli katak, komunidade no forsa sira la’o tuir dalan ne’ebé ran turuk ba mai lakon de’it iha area Taha Masi nian.

“Maibé, la’o la to’o distansia metru 20 hanesan ne’e ami konsege hetan hena ne’ebé nakonu ho ran, entaun ami la’o tuir de’it dalan ne’e hetan fali tan ran turuk iha dalan, entaun ikus mai to’o duni iha fatin sira subar ba ne’e”, fontes ne’ebé lakohi hakerek nia identidade ne’e iha nia rezidensia konta, Domingu, (9/8).

Kona-ba númeru hosi membru FALINTIL-Forsa Defesa Timor-Leste (F-FDTL) ne’ebé komando hatun iha operasaun ne’e hamutuk batallaun 1 inklui apoiu hosi Polísia Nasionál Timor-Leste (PNTL) no komunidade sira.

Nune’e loron Sabadu, (8/8) maizumenus tuku 13.00, EOK konsege hetan ona subar fatin MM ho nia membru iha area Watu Saha Loi, aldeia Uai Talibu, suku Uato Haco nian.

Iha fatin ne’e, Mauk subar hamutuk ho nia membru Júlio, José Sunardi da Silva, Golden Boy no Lemorai. Operasaun hosi EOK nian ne’ebé la’o iha area Watu Saha Loi no Watu Kai Tara nian ne’e hetan ona ran ne’ebé tama to’o ba iha fatuk kuak laran. Molok mosu atentadu, Ministru Defesa, Cirili Cristovão mós marka prezensa.

Fontes ne’e hatutan tan, momentu ne’e, MM ho Golden Boy mak uza pistola, Lemorai ka’er kilat AK 47 no deskonfia José Sunardi ka’er granada. Atentadu ne’e akontese iha tuku 16.00.

“Kolega forsa nain rua mak tama ba no hetan Mauk Moruk iha laran, maibé laiha reasaun. Depois ida ne’e, kolega forsa rua ne’e sai fali mai fó hatene ba sira seluk, no bainhira ami to’o mai ho distansia metru 10 hanesan ne’e, Mauk Moruk tiru hasoru ami dala lima, tanba ne’e ami foti kedas asaun hasoru no hamate sira. Mauk tiru kona iha ibun no isin lolon, Júlio no Sunardi kona iha isin, no Golden Boy kona ain no monu ulun baku ba fatuk mak kanek no Lemorai kanek iha isin, mas nia halai sai lalais, no iha fatin atentadu ne’e hetan mós telemovel no sim card”, fontes ne’e konta.

Nia afirma, Lemorai halai lakon ho kilat AK 47 ida, granada no pistola Golden Boy nian, tanba pistola ne’ebé mak Golden Boy ka’er monu, to’o oras ne’e buka la-hetan.

“Maibé iha tempu dadersan, EOK konsege kaptura estafeta (mata dalan) MM nain rua, ida kaptura iha area Venilale nian no nain ida kaptura iha area Lanud-Triloka tanba tenta atu lori hahan ba MM ho ninia grupu”, fontes ne’e konta tan.

Hafoin atentadu, EOK lori MM nia mate isin tau iha plastiku hodi tau iha kareta, depois lori ba area Venilale Vila nian hodi tula ho aviaun MkM, HV-UVA maizumenus tuku 18.00 no lori kedas mai iha Díli.

Entertantu, mate isin Júlio no José Sunardi da Silva, EOK lori ba tau iha Sentru Saúde Venilale no tula mai Díli hodi halo autopsia ho kareta ambulansia iha tuku 20.40. Alende ne’e, membru seluk ho naran Golden Boy ne’ebé mak hetan tiru iha ain, tula sai hosi Venilale iha tuku 20.00 no hetan seguransa masimu hosi EOK.

Nia dehan, hafoin atentadu ne’e, membru EOK balun komesa retira, maibé sei iha nafatin operasaun hodi buka tuir membru MM ho naran Lemorai.

Fontes ne’e dehan, Polísia Nasionál Timor-Leste (PNTL) eskuadra postu Administrativu Venilale, munisípiu Baucau, iha loron Kinta (6/8) maizumenus tuku 13.00, halo kapturasaun ba membru KRM hamutuk nain tolu iha area Hasa La’e Tula, fronteira entre Venilale no posto Administrativu Ossu, munisípiu Viqueque.

Kapturasaun ba membru KRM nain tolu akontese, bainhira komunidade sira hato’o informasaun ba parte polísia. Fontes ne’e dehan, momentu ne’e MM hamutuk ho nia grupu la’o (la-hatene ba loos ne’ebé) fahe malu iha fatin tolu.

Grupu ida la’o hosi suku Lia Ruka, posto Ossu, munisípiu Viqueque no grupu ida la’o hosi diresaun Kai Wa Hu aldeia Kaitia, suku Fatulia, posto Venilale.

Nia konta, grupu ne’ebé la’o iha suku Lia Ruka kompostu hosi ema nain 10 resin. Grupu ne’ebé la’o iha parte Hasa Lae Tula hamutuk ema nain 12 no nain sia la’o liu, nain tolu seluk la’o sala dalan, tanba ne’e komunidade hetan no hato’o informasaun ba polísia.

Tanba ne’e, maske prezidente KRM, MM ho nia membru seluk mate ona, maibé EOK sei kontinua buka nafatin membru sira ne’ebé sei halai lakon inklui Lemorai.

Tuir informasaun ikus ne’ebé mak Administrador posto Venilale, Júlio Tome da Silva informa iha Domingu, (9/8) tuku 18.30 katak, maske seidauk halo kapturasaun ba Lemorai maibé EOK sei kontinua buka tuir nafatin.

“Oras ne’e dadaun situasaun atual iha Venilale la’o normal hanesan bai-bain, EOK kontinua iha ne’e, no ami kontinua apela no konsola komunidade sira atu kontinua tur hakmatek no labele rona voatus oi-oin”, Júlio informa.

Total membru KRM ne’ebé mate hosi akontesementu ne’e mak Domingos Soares, Júlio, Sunardi inklui MM.

.