José Luis Oliveira: Xanana-Mari Iha Governasaun, PM Rui Poder Laiha

.

Jornal Nacional Diario - 27 de agosto de 2015

Diretur Ezekutivu Asian Justice and Right (AJAR), José Luis Oliveira hatete katak, Primeiru Ministru (PM) Rui Maria de Araújo labele implementa programa sira ne’ebé mak nia ko’alia ona ba públiku, tanba Xanana ho Alkatiri mós sei partisipa iha VI Governu ne’e nia laran.

“Governunasaun ida ne’e, partisipa husi kuaze partidu hotu iha Parlamentu Nasionál. Entaun kuandu partidu hotu iha Parlamentu mak hot-hotu partisipa iha Governasaun ne’e, klaru katak, ita nia opozisaun laiha. Kuandu opozisaun laiha, ida ne’e mós kontribui ba governasaun ida ne’e, laiha balansu,”katak José Luis Oliveira ba jornalista sira iha Ministériu Finansas, Kuarta (26/8).

Kuandu Rui Araújo sai Primeiru Ministru, nia promete no hato’o ona ideias barak ne’ebé mak di’ak. Maibé realidade ideIas sira ne’e, nia labele konkretija, ho didi’ak, tanba Xanana ho Alkatiri teri netik nia (Rui Araújo).

“Governu rasik, ita hare iha maun bo’ot nain rua, hanesan maun Xanana no maun Mari mós partisipa iha ne’eba, i sira nain rua ne’e hanesan aihun bo’ot rua, ne’ebé mak haleu Primeiru Ministru. Ita hatene katak, kuandu aihun bo’ot ne’e moris mai, sasan ki’ik sira iha okos ne’e, mate hotu,”katak José Luis.

“Hau mós aseita katak, sestu Governu ne’e todan liu, no tanbasa mak nia todan liu, tanba Primeiru Ministru Governu ida ne’e, laiha poder ne’ebé mak solidu atu apoia ninia governasaun,”afirma José Luis.

Nia haktuir, Rui Araújo hanesan Primeiru Ministru, maibé ninia forsa no poder polítiku ne’e, la solidu no la forte, tanba iha poder maun bo’ot rua ninia le’et. Situasaun ida ne’e mak akontese iha governasaun ida ne’e, tanba Primeiru Ministru Rui Araújo laiha poder.

Nia afirma, problema ida ne’e, la’os dehan katak, Primeiru Ministru Rui Araújo bele halo, maibé Xanana ho Alkatiri mak tenke iha konsiensia.

“Ha’u husu Xanana ho Alkatiri sira nia konsiensia Estadu, atu ho laran nakloke no laran ksolok no laran Kaman, husik Sr. Primeiru Ministru Rui Maria de Araújo ne’e, ukun tuir ninia hakarak no tuir ninia vondate,”tenik José Luis.

Nia esklarese, tanba Xanana ho Alkatiri mak iha poder bo’ot liu iha sestu Governu ida ne’e, entaun sira nia intrese mak barak liu duke Primeiru Ministru Rui Maria de Araújo nia hakarak.cos

.