Tanba halimar governu sei lakon ninia autoridade hanesan Estadu

.

Timor Post- 09 de julho de 2015

Dosente Universidade Nasionál Timor-Lorosa’e (UNTL), Matias Boavida hatete, durante ne’e governu uza estratejia oi-oin hodi netraliza situasaun seguransa interna, maibé seidauk konsege e rezulta Luis Ramos lakon vida tanba hetan tiru hosi membru KOK.

“Governu sei lakon ninia autoriedade hanesan estadu. Tanba estadu labele halimar ho situasaun. Ba ha’u nia haree katak situasaun ne’e hanesan tentativa subversaun ba estadu,” Matias ba Timor Post iha Hotel The Ramelu Aimutin-Dili, Tersa (7/7).

Matias Boavida hatutan, liga ba kazu MM governu tenta uza non-violent approach, maibé ema balun aproveita situasaun ne’e sai hanesan projetu ida hodi depois alkansa buat ne’ebé mak sira nia mehi no hakarak.

Nia kompara, 2008 F-FDTL konsege halo estratejia, ikus mai grupu Salsinha Cs bele entrega-án. Maibé, situasaun diferente ho situasaun ohin loron tanba hahú ho krize.

“Ne’e ema ida ne’ebé kontra estadu. Laiha diferensa entre saida mak Alfredo halo iha tempu pasadu ho saida mak agora Mauk Moruk halo. Loloos ita tenki trata ida ne’e hanesan. Infelizmeten ida ne’e ita la-halo ida,” esplika Matias Boavida.

Solusaun ba situasaun ida ne’e mak estadu tenki mantein pozisaun firme, ka’er moris ka mate.

.