Mauk Moruk:"Ha'u la telefona ba Lere, Ramos-Horta bosok"

.

Timor Hau Nian Doben - 15 de julho de 2015 - Tradusaun hosi Oan Kiak

Eis komandante FALINTIL nian no Presidente Konsellu Revolusaun Maubere, Mauk Moruk, foin lalais koalia ho blog ida ne'e no nia dehan katak deklarasaun sira ke Ramos-Horta fo'o sai iha media mesak falsu no  nia dehan katak nia la telefona ba Jeneral Lere Anan Timor, hot-hotu "lia bosok".

Ramos-Horta fo'o sai deklarasaun balun iha media katak Mauk Moruk telefona ona ba Lere Anan Timur no iha esperansa ke kazu ne'e sei rezolve "lalais".

“Ha’u hatene sira telefone ba malu. Moruk telefone ba Komandante boot FALINTIL-FDTL, ha’u entrega ba Maun Lere. Ha’u entrega ba Maun Lere nia liman la’ós planu operasionál, maibé planu polítika", dehan ba Timor Post antigu Xefe Estadu. 

"Hot-hotu lia bosok. Ramos-Horta bosok, nia halo jogadas Xanana nian.Horta hakarak duni negoseisa ho ha'u, maibé ha'u la fiar nia, ha'u hatene sé maka ha'u bele fiar. Ha'u la ba negoseia ho ema bandidu ke oho povu ba sira ukun to'o mate", hateten Mauk Moruk.

"Sira ba bosok ba media tanba ha'u nonok hela no ha'u la halo deklarasaun barak ba media, no sira hanoin katak sira konsegue halo ha'u nonók, tanba uainhira sira asaltu ami, sira destroi ami nia ekipamentu komunikasaun barak, maibé ita sei iha balun", haktuir.

Mauk Moruk konfesa katak nia koalia duni ho Xefe Estadu-Maior FALINTIL -Forsa Defeza Timor-Leste, Lere Anan Timur,  maibé la'os foin, maibé oras ne'e nia lakohi halo kontaktu via telefone tanba sira bele lokaliza nia. 

"Ha'u foin la koalia ho Lere, ha'u koalia ho nia kleur ona, oras ne'e ha'u tenki kuidadu tanba ha'u nia telefone bele fo'o sai ba sira ha'u nia hela fatin ho GPS, tanba ne'e ha'u la telefona ba ema nein ida no ó mos labele fo'o sai ha'u nia numeru ka ha'u nia email. Lere halo Xanana nia jogadas, nia la'os ema politiku ida, nia ema militar ida, labele halo politika", dehan. 

"Lere mai Atelari ho forsa sira ho kilat funu nian, sira halo serku anikilamentu, sira hakarak oho ami, hanesa indoneziu sira halo mai ami. Maibé ha'u hela iha Foho Matebian nia tutun no ha'u hamnasa maka'as hela. Imi mai, imi mai no ha'u halo ba sira hanesa ha'u halo ba pelotaun indoneziu ida...", dehan eis komandante FALINTIL nian ho hamnasa.

Eis komandante FALINTIL akuza forsa seguransa sira no nia dehan katak sira trata povu ho hahalok dezumanu, sira destroi povu nia sasan no nia husu ba mundu hodi proteije povu ida ne'e hosi "hahalok aat tebes" hosi governu ida ne'e.

"Polisia no militar sira oho ema, sira viola feto sira no baku povu. Sira mos destroi povu nia sasan. Ukun na'in sira mafiozu no sira habokur de'it sira nia bolsu. Sira koalia kona ba dezenvolvimentu, dezenvolvimentu ida ne'ebé? Sira nia dezenvolvimentu maka habokur de'it sira nia bolsu no sira bokur ba beibeik ho hahalok naok, tanba povu ida ne'e ke terus seidauk goza independensia ida ne'e. Sira ema ho poder bobot teb-tebes, sira hakarak maka naok no naok povu nia osan. Hahalok ida ne'e labele kontinua hanesa ne'e", dehan ho triste.

"Sira hotu diabu, sira ditador, mate restu hosi ema hanesa Hitler, Pinochet, Suharto no Salazar. Loron ida povu sei hamrík no hasoru ditador sira ne'e, ó ba haré katak liafuan ke ha'u koalia agora los duni. Ditadura sira iha mundu tomak monu, diabu sira ne'e mos sei monu", dehan ho serteza.

"A luta continua!A luta continua!A luta continua!", Mauk Moruk ramata hanesa ne'e konversa ida ne'e via telefone ho Timor Hau Nian Doben.

Português: Mauk Moruk:"Eu não telefonei ao Lere, Ramos-Horta está a mentir"

.