"KOK asalta L7 nia uma iha Laga no destroi kaixaun ho mate ruin"

.

Timor Hau Nian Doben - 13 de julho de 2015

Tuir Timor Hau Nian Doben fonte ida iha Baucau, iha loron sabádu, besik tuku ualu dader, membru balun hosi Komandu Operasional Konjunta (KOK) asalta eis komandante Falintil nian, L7, nia uma iha Laga, distritu Baucau no estraga kaixaun no naok sasan balun. 

"Situasaun kada vez pior, horseik dader besik tuku ualu KOK baku rahun Pai Eli (L7) nia uma no estraga kaixão ne'ebé Pai Eli tahu mate ruin sira durante tinan barak. Pai nia fen mós halai tiha mai Díli, hau triste tebes rona notísia ida ne'e", informa.

Tuir ami nia fonte seluk nia haktuir ba blogue ida ne'e katak KOK buka Mauk Moruk no tanbá "Tia Julieta" (Komandante L7 nia kaben) ba tiha Díli no taka uma entaun forsa seguransa sira estraga odamatan ba tama iha uma laran.

"Hanita horseik dader tuku ualu asaltu Komandante  L-7 nia uma iha Laga. Tanba komandante  nia kaben, Tia Juleta, ba tiha Dili no xave hotu odomatan, membru Hanita mai selok odamatan ho aisuak bot mak loke, maibe la hetan buat ida iha uma laran", dehan.

Fonte ida ne'e dehan tan katak KOK kaer mane ida ke hela iha Komandante L7 nia uma hodi rai mate ruin sira no forsa konjunta naok minioklu ida ba hateke rai no sasan balun tan.

"Hanita mos kaer joven ida naran Paul ke hela iha uma ke rai mate ruin sira no naok minioklu ida ba hateke rai no sasan balun tan", haktuir.

Timor Hau Nian Doben foin koalia ho veteranu ida no nia dehan katak governu hakarak destroi "ami hotu" no "iha tempu badak sei haruka mai kaer ami hotu".

"Governu hakarak destroi ami, tanba sira tauk lialos ke sei mai sedu ou tarde. Ukun nain sira drogado hotu, sira la hatene saida maka akontese ba sira nia povu.Kontinua oho povo inosente ba sira nia interese. Triste hare situasaun ne'e, diak liu ami mate ho tiru duke moris la livre iha ita nia rai rasik", katak veteranu ho triste. 

"Ó koalia sala la koalia mós sala, la hatene los sira nia planu ne'e saida ba povo rai doben ne'e. Ami prontu mate ba lialos.Iha tempo badak sira atu kaptura ami hotu  tanba konselho ministru fo sai tiha ona orden", nia ramata.

.