Pedro Carrascalão "sadik" Kalbuadi

.

Pedro Carrascalão

Pedro Carrascalão - Timor Post - 11 de junho de 2015

Entretantu, eis jogador nu’udar mos Fundadór FC CARSAE ne’ebé loke iha tempu Indonézia nian, Pedro Miguel Carrascalão sadik Prezidente FFTL, Kalbuadi Lay, atu mantein nia dignidade hodi organiza kongresu ekstra-ordináriu hodi rejolve problema barak ne’ebé públiku preokupa iha FFTL nia laran.

“Karik Prezidente FFTL agora manan nafatin entaun ida ne’e mos nia direitu, maibé di’ak liu halo kongresu ona atu futeboll bele dezenvolve di’ak liu iha Timor laran tomak,” hatete Pedro Carrascalão ba Timor Post, Tersa (09/06/2015).

Pedro Carrascalão hatete, nia koñese di’ak Kalbuadi. Tanba ne’e nia hatutan, tempu too ona ba Kalbuadi atu entrega ona kargu ne’e ba ema seluk ne’ebé iha motivasaun boot liu ne’ebé bele dezenvolve futebol lais liu.

“Ita hotu hadomi Timor Leste, nune’e ita tenke kompriende malu katak buat hotu la’ós ha’u nian de’it maibé Ita hotu nian. Espera katak ha’u nia kolega Francisco Kalbuadi bele rona ha’u nia pedidu hanesan kolega ida. Tempu to'o ona atu entrega ba ema seluk,” subliña Pedro Carrascalão.

Kona-ba kazu mafia ne’ebé komete hosi timoroan nain rua iha Singapura, nia hatete, loloos ne’e Sekretáriu Estadu Leovigildo Hornai labele fó lai komentáriu antes hatene loloos kazu ne’e.

.

Tuir nia, atetude Orlando ne’e la’ós privadu tanba nia ba lori ekipa nasional nomos iha kontigen Timor Leste nian iha Sea Games ne’e. Pior Liu FFTL halo estatmentu katak la tolera Orlando.

“Ha’u hanoin FFTL labele hatete la tolera maibé lolos husu deskulpa ba públiku Timor Leste katak buat ne’e akontese nomos promete atu investiga mos kazu ida ne’e. Ida nee mak los. Autoridades Singapura hala’o sira nia kna’ar kaer ema Timor nain rua ne’ebé iha ona evidénsia katak sira involve ba game fixing. Mezmuke to’o ohin loron ita sidauk rona Orlando nia lian atu defende nia a’an, maibé sedu liu ba SEJD dehan ida ne’e problema privadu nomos FFTL fase liman hatete de’it katak la tolera Orlando,” lamenta Pedro Carrascalão.

Nia hatutan, lider ka organizasaun ne’ebé di’ak tenke asumi responsabilidade nia estrutura, mezmu ke ema ida iha nia estrutura halo sala, lider ka organizasaun ne’e tenke hamri’ik iha públiku nia ohin husu deskulpa nomos promete halo investigacao.

“Tenke hatudu ezemplu ne’ebé di’ak. La’ós kultura dudu liman ba malu kuandu sala, i hamutuk kuandu hetan benefísiu. Ha’u sidauk bele komentáriu barak liu kona-ba Orlando tanba sidauk klaru nomos ita sidauk rona Orlando mos defende nia a’an ka ko’alia buat ruma. Karik Orlando mos bele ko’alia katak nia la tolera FFTL nune’e bele mos buka tan buat ida ne’ebé ita hotu deskonfia hela de’it katak buat barak la los.

Kona-ba Amante halo demostrasaun, Pedro Carrascalão hatete, ne’e normal “Sira iha direitu tanba hadomi futebol liuliu nasionalizmu ba nasaun ne’ebé iha mídia internasional agora dadaun halo naran Timor foer oituan kona-ba futebol,” subliña eis jogator Timoroan ne’e. (flo/cão)

.