Pae L7 manan tiha ona, la presiza kole an tan ho manifestasaun...

.

José Monteiro

Hau orgullu tebes ita nia Aman L7 tanba nia hatudu ba ita hotu saida mak nasionalismu, demokrasia no saida mak hadomi povu maubere nomos saida mak aswain ida.

Mai hau, tristi tebes hare Governu illegal Rui nian nakdeder no hili deskulpa-deskulpa tanba lakohi Pai L halo manifestasaun, tanba sira tauk tanba sira hatene katak ita Aman boot iha suporte barak iha Timor Loro Sa'e tomak. Sira lakohi fo autorizasaun tanba sira hatene katak povu bele hamrik no hasoru governu ne'e, tanba ita hotu hatene ona katak, governu Rui Araujo nian, governu ida ke illegal, nakonu ho ema kriminozu, opurtunista, balun sira nia fatin mak komarka.

Tristi tebes hare governu ida ne'ebe lidera hosi ema gerasaun foun ida no Rui Araujo seidauk hatene momos saida mak demokrasia no pior liu tan laiha koñesimentu ba ita nia Konstitusaun Republika rasik. Ita mos tenke matan moris tanba ita hotu hatene katak Rui Araujo la'os duni ita nia Primeiru-Ministru, loloos nia Xanana nia TBO. Rui Araujo troka de'it fatin maibe Xanana mak sei lidera governu ne'e.

Pae L7 lalika fadigadu tan ho manifestasaun, tanba tenke mos iha kuidadu tanba kriminozu sira ne'e tinan barak ona mak buka justifikasaun ida hodi halo Pae L terus tan, sira fo ona TIR ba pae no agora buka seluk seluk tan hodi akuza Pae no karik lori Pae ba komarka. Sira nunka bele hetan respeito no domin hosi povu hanesan Pae boot hetan, tanba sira la hadomi povu no rai ne'e hanesan Pae. Pae mos hatene katak povu maubere nafatin metin ho Pae, tanba ne'e mak sira  tauk. 

Pae tenke kuidadu ho indonezia emboot nia oan, tanba iha nia leet nia iha ema barak la gosta Pae, sira lakohi diak ba Pae tanba sira hatene Pae mak povu respeita, Pae mak povu maubere hadomi. Ita hotu hatene se mak hela ho ami iha funu nia laran. Emboot nia oan Rui Araujo la terus ho ami, nia la hatene saida mak terus hamutuk ho povu maubere. 

Pae L7 dala ida tan hakarak halo manifestasaun tan prekupa ho povu nia moris, tanba preokupa ho korupsaun iha governu illegal indonezia emboot nia oan, maibe sira iha poder hodi taka pae nia lian. Pae sira bele taka Pae nia lian ohin, ka aban, maibe sira la bele taka povu nia lian nafatin. Povu sei hamrik Pae, no bainhira povu hamrik Maromak la konsegue salva koruptor, opurtunista no kriminozu sira. Sira fo ka la fo autorizasaun hodi Pae halo manifestasaun, Pae L7 nafatin manan, Indonezia emboot nia oan mak lakon ona.

Sira dehan katak sira se uza forsa hasoru Pae karik asaun pasifika ne'e sei lao ba oin, sira bele uza forsa maibe Maromak forsa liu sira no hau fiar katak se tulun nafatin ami hotu.

Obrigadu Pae tanba dala ida tan hamutuk ho ami hodi fo tulun mai ami. Pae L7 manan tiha ona, la presiza halo manifestasaun tanba sira bele hetan motif ida ba kaer Pae no povu maubere se presiza tebes pae no indonezia emboot nia oan bele lasu Pae, ita la bele fiar ema sira ne'e. Ita labele haluha saida mak akontese iha Aitana ne'eba, masakre boot tebes. Ami se la haluha. Ami hatene se mak hadomi rai no povu ne'e.

Viva Pae L7!

.