Lu-Olo Ladun Konkorda ho L7 nia ezijensia balun

.

Timor Post - 25 de junho de 2015

DILI-Eis Prezidente Parlamentu Nasionál (PN) iha Primeiru Lejislatura, Fransisco Guterres Lu Olo konsidera deklarasaun hosi Cornelio Gama L-7 kona-ba injustisa sosial  iha Timor-Leste ne’e ladun iha baze ida forte.

Tuir Prezidente partidu FRETILIN ne’e katak, se bainhira sidadaun ida la konkorda ho servisu governante ka ukun na’in sira nian, iha dever mós atu hatudu evidénsia  no faktus bainhria akuza ema ida.

“Kona-ba injustisa sosial  ne’e fali ne’e FRETILIN ne’e uluk kedas ami hatete iha governasaun Aliansa Maioria Parlamentar (AMP) nia tempu, ami ko’alia  hela nafatin. Maibé iha altura ida ne’eba señor  L-7  mós hanesan hela deputadu iha Parlamentu Nasionál sira fó apoiu malu hela para hodi bele halo sasan (injustisa sosial) sira ne’e, agora talvez kala sai tiha ona maka hodi bele ko’alia  hanesan ne’e,” hatete Lu Olo iha PN hafoin remata tiha sorumutu ho Komisaun A kona-ba lei partidu Politíku, Kuarta (24/06).

 Alende ne’e, hanesan eis titulares ida, Fransisco Guterres Lu Olo mós lakonkorda ho deklarasaun hosi  L-7  ne’ebé ezije ba governu no instituisaun PNTL no F-FDTL atu hasai tiha Ministru Interior, Longuinhos Monteiro, Komandante Distritu Dili, Super-intendente Xefe Pedro Belo no Vise Xefe Estadu Maior Jeneral F-FDTL, Brigadeiro Jeneral Filomeno Paixão tanba konsidera falta respeitu ba veteranus sira iha rai laran.

Tanba tuir Lu Olo katak, ema sira ne’e lei (estadu) maka koloka iha ne’eba, no sira ne’e orgaun kompetente maka tau sira iha ne’eba para atu dirije instituisaun estadu ninian.

“Ne’ebé atu hasai ne’e só kompetensia ema sira ne’e nian maka hasai, labele liu hosi  demo maka hasai fali ema sira ne’e,”katak Lu Olo.

 Ba nune’e, hanesan eis gerileiru ida, Lu Olo husu ba L-7  atu ho nia membru sira tomak atu hakmatek iha fatin hodi kontribui ba dezenvolvimentu no estabilidade nasaun nian.

“Ita labele dehan kuandu impede manifestasaun ahi sei sai uma (sunu uma) ne’e krime fali ona, ne’ebé pronto señor  L-7  bele iha direitu no liberdade ba buat hotu, maibé ita nia liberdade ne’e mós tenke limita ho liberdade ema seluk nian liliu ho estadu ninian, nune’e garante ho lei,” husu Lu Olo.

.