Lere Husu L-7 Kumpri Ordem PNTL – Labele Kria Anarkismu

.

Konstituisaun Repúblika

Jornal Nacional Diário - 19 de junho de 2015

Xefi Estadu Maior FALINTIL-Força Defesa Timor-Leste (F-FDTL), Maijor Jeneral Lere Anan Timur, husu ba Cornelio Gama “L-7” atu kumpri ordem Komando Polisia Nasional Timor Leste (PNTL) nian atu la bele halo manifestasaun.

Hafoin hasoru malu ho Prezidenti Republika (PR), Taur Matan Ruak, iha Palasiu Presidensial, Kuarta (17/6/2015), Maijor Jeneral Lere hateten, F-FDTL la iha kompetensia atu bandu L-7 halo manifestasaun ou lae, maibe PNTL ho Ministeriu Publiku iha kompetensia atu autoriza manifestasaun ne’e ou lae.

“Se PNTL la aseita diak liu lalika, la aseita ita labele impoin ne’e ita dehan anarkismu. Timor la hanesan ona uluk, ida-idak manda ninian,” afirma Maijor Jeneral Lere Anan Timur.

Bainhira husu Mauk Moruk to’o agora seidauk identifika, Lere responde katak, maske KOK la identifika Mauk Moruk nia subar fatin, maibe Mauk Moruk iha Timor nia mos tinan 63 ona nia atu halo funu to’o iha ne’ebe.

“Agora ita nia politika sira koalia kona-ba fronteira tasi nian, atu lori Australia ba Tribunal Arbitrazen, ita tenki preokupa ida ne’e, ita labele preokupa buat sira korrupsaun ida ne’e ita iha vizaun ida la hateke ba dok,”tenik Lere.

Lere dehan, liberdade ne’e fo hanoin ba ema hotu –hotu atu espera nia sentimentu halo demonstrasaun, maibe demonstrasaun bele fo mos konsekuensia a’at ba nasaun.

Maijor Jeneral Lere Anan Timur halo enkontru regular ho PR Taur Matan Ruak hodi informa kona-ba servisu forsa armadas nia   nian.

“Ha’u informa ba PR Taur Matan Ruak kona-ba situasaun forsa armadas nian no ninia servisu kursu no buat sira ne’ebe mak ami halo durante semana ida nia laran,” hateten Lere Anan Timur.

.
KOMANDO SEI ATUA

Kódigu Penál

Nune’e mos, Segundu Komandante Jeral Polisia Nasional Timor Leste, komisariu Faustino da Costa hatete, karik eis komandante gerileiru Falintil, Cornelio Gama ‘L-7’ mantein organiza manifestantes rihun ba rihun hodi halo manifestasaun komando sei halo atuasaun.

Komisariu Faustino da Costa esplika katak, pedidu L-7 nian atu halo manifestasaun hahú husi loron 22 to’o loron 28 fulan juñu komando konsidera, maibe komando halo analiza ba pedidu deside la autoriza L-7 halo manifestasaun.

“Komando la autoriza señor L-7 halo ninia manifestasaun hahú husi dia 22 to’o 28 ho razaun, primeiru ita iha situasaun operasaun segundu L-7 rasik simu desizaun husi tribunal ho Termo de Identidade Rezidencia (TIR),”afirma komisariu Faustino ba jornalista sira iha akademia polisia, Comoro, Kuarta (17/06).

Komando Faustino da Costa deklara, relasiona ho razaun sira ne’e hotu maka komando konsidera no repeitu katak L-7 labele organiza ka la autoriza halo manifestasaun.

Tuir segundu komandante ne’e katak, L-7 mos presiza kompriende situasaun rai laran nian.

“Se dehan komando la autoriza ona ita tenke kopera tanba ita hotu hakarak buat ne’ebe maka diak paz no estabilidade iha ita nia rain. Ha’u husu señor L-7 mos kopera ho polisia tanba bele hamosu situasaun ne’ebe maka ita hotu la espera. Ami mos mantein ami nia pozisaun katak notifika ona katak labele, maibe se karik ema balun maka envolve tenta atu hala’o fila fali asaun ida ne’e em nome L-7 ami sei halo atuasaun ne’ebe maka seriu,”dehan Komisariu Faustino da Costa hodi responde ba dia 22 karik L-7 mantein pozisaun hodi halo manifestasaun.

Entertantu antes ne’e, Eis gerileiru Cornelio Gama L-7 hatan katak, nia parte kontinua firmi hala’o manfestasaun, ne’ebe mak sei organiza manifestante rihun resin hodi halo manifestasaun tanba Prezidente Repúblika, Parlamentu Nasional mos autoriza, no lei mos fo dalan atu hala’o manifestasaun importante maka labele halo konflitu hodi estraga nasaun.

“Hau Kontinua mantein (manifestasaun) agora dadauk hau nia masa kuaze rihun nen ka rihun hitu hanesan ne’e tun mai mak ita hare,”Afirma Cornelio Gama L-7, ba Jornalista sira iha nia hela fatin, Bidau mota klaran ,Tersa (16/06).

L-7 mos promete, iha manisfestasaun ne’e sira nia parte sei kontrola maka’as, karik manifestante sira maka tolok iha manifestasaun laran mos sei kaer. Forsa husi Manifestasaun Polisia maka kontrola tanba sira maka seguransa popular.

Nune’e mos, eis komandante gerileiru Falintil, Cornelio Gama ‘L-7’ deklara, Komando Operasaun Konjunta (KOK) la retira husi terenu maka nia alin Paulino Gama ‘Mauk Moruk’ (MM) ne’ebé fugitivo hela sei la rende.

L-7 afirma katak, Estadu hakarak Mauk Moruk rende hodi kopera ho justisa mak tenke retira total KOK.

Tuir L-7 katak, karik Mauk Moruk iha sala ruma hanesan Timor oan bolu malu hodi rezolve problema ho pasiensia, la’os uza kilat ba ameasa sira.

Eis gerileiru ne’e reforsa katak, nia parte lakohi kopera ona ho KOK tanba to’o oras ne’e KOK lakohi retira, no KOK sira hakarak buka Mauk moruk to’o kaer hodi hasa’e sira nia Diviza.

“Ha’u aproxima ho Mauk Moruk, se KOK la retira mauk moruk mos la retira kontinua mantein pozisaun. KOK tenke retira total,”afirma L-7 ba jornalista sira iha nia hela fatin Bidau, Tersa (16/06).

Nia hatutan, durate kopera ho KOK hodi aproxima ho Mauk Moruk tun mai hodi hatan ba Justisa, maibe tanba deit KOK la retira entaun Mauk Moruk mos lakohi tun mai hodi entrega-an ba KOK.

L-7 konsidera rezolusaun ne’ebe maka parlamentu aprova hodi buka tuir Mauk Moruk iha parte leste, ladiak.

“Rezolusaun sala tanba lori fali kilat ba ameasa povu, tuku, tebe polulasaun sira. Tanba uluk ami falintil haree povu hanesan maromak hanesan osan mean, agora ukun an tiha tuku tebe ema ne’e maka problema kontra lei internasional tanba Governu haruka tuku tebe ne’e viola direitus umanus,”eis gerileiru ne’ e preokupa.avi/Eus

.