Kazu MM, Horta Tau Fiar Ba Lere Anan Ho Taur Matan Ruak

.

Timor Post - 30 de junho de 2015

Dili-Eis Prezidente Repúblika (PR), José Ramos Horta fo fiar ba Prezidente Repúblika (PR), Taur Matan Ruak no Xefe Estadu Maior F-FDTL, Maijor Jeneral (Maijen), Lere Anan Timur hodi rezolve problema Mauk Moruk no Cornelio Gama L-7 nian.

“Prezidente Taur Matan Ruak, nia tinan 24 iha ai laran, nunka tun mai Dili, Lere mós nune’e, iha Timor ne’e laiha veteranu ruma inportante liu Prezidente Taur ho Lere, sira mak bele haree oinsa mak bele rezolve problema ida ne’e,” Horta hatete  ba jornalista sira iha Palásiu  Prezidensial, Bairo Pite, Segunda, (29/06), hafoin hala’o enkontru ho Prezidente Repúblika (PR), Taur Matan Ruak.

Premiadu Novel ba Paz ne’e apela ba Mauk Moruk ho nia grupu atu di’ak liu rende no koopera ho justisa. “Ha’u rasik halo apelu ba Mauk Moruk, di’ak liu simu Prezidente da Repúblika nia lia fuan hapara asaun sira hotu-hotu ne’ebé nia elementus sira halo, tun mai Dili ho garantias para halo diálogu  tanba estadu labele interfere iha tribunál,” afirma Ramos Horta.

Horta hatutan estadu labele interven iha tribunál  tanba sidadaun hotu sujeitu ka hakruk ba Tribunál. Nune’e Mauk Moruk mos tenke hanoin didi’ak paz no dame iha nasaun foun ne’e hodi kontribui ba dezenvolvimentu nasionál.

“Ita hotu-hotu sujeitu ou depende ba Tribuanl, buat ne’ebé iha Tribunál, estadu labele book, labele hatun, maibé  bele halo diálogu  depois mak ita haree ba solusaun, ne’e ha’u nia apelu ba L-7 no Mauk Moruk,” subliña Ramos Horta.

Tuir Ramos Horta, Xefe Estadu Taur Matan Ruak iha vontade boot hodi rezolve problema Mauk Moruk nian.

.