Eskandalu Jogus SEA Games, Autoridade Singapura Kaptura Diretor Tekniku FFTL

.

Jornal Nacional Diário - 01 de junho de 2015

Biro Investigasaun Korupsaun Singapura (CPIB) relata katak, sira nia parte kaptura ona suspeitu nain hat (4), ne’ebe maka sai autor ba eskandalu pengaturan skor iha jogus SEA Games 2015 entre Timor- Leste kontra Malaysia.

Informasaun ne’ebe publika husi www.channelnewsasia.com no haktuir iha www.VIVA.Co.Id edisaun Sabadu, 30 Maiu 2015, katak, entre suspeitu nain 4 ne’e, involve mos suspeitu balun sidadaun Indonesia, Singapura no Timor Leste.

Informasaun seluk ne’ebe espalha ona iha públiku Timor katak, suspeitu husi Timor nian maka Diretor Tékniku Federação Futebol de Timor Leste (FFTL), Orlando Mendes.

Antes ne’e, CPIB relata ona katak, sira kaptura mos sidadaun Singapura ida tanba sai bandar hodi manobra golu iha jogus ne’ebe hala’o Sabadu (30/5/2015), iha Bisham Estadium. Nune’e, alastra mos katak iha tan ema nain tolu ne’ebe sai hanesan estafeta iha aktu joga foer ne’e.

Husi rezultadu invetigasaun fo sai katak, suspeitu nain 4 deklara katak, sira husu duni ba jogadores balun husi Timor Leste nian atu joga ho performa standar, atu nune’e, Malaysia bele manan iha jogus kontra Timor Leste. Rezultadu ikus, Malaysia konsege manan duni Timor Leste ho skor ka golu 1-0.

Osan ne’ebe asegura iha skandalu ne’e bot. Jogadores sira husi Tiomor Lorosae kontrata ho valor US$ 15.000 atu bele haktuir joga foer ne’e. Maibe, jogador sira la kumpri no halo kedas keixa ba autoridade kompetente.

To’o ohin loron, suspeitu nain 4 ne’e sei iha autoridade seguransa Singapura nia liman. Karik iha evidensia hatudu katak, sira sala duni maka bele hetan pena prizaun tinan lima no denda US$ 100.000.

To’o notisias ne’e hatun seidauk hetan klarifikasaun no konfirmasaun husi FFTL, tanba dirijentes sira FFTL nian ba tuir hotu kongresu FIFA nian iha Suiça. Maske nune’e, informasaun ne’ebe iha katak, Prezidente FFTL, Francisco Kalbuadi Lay, ne’ebe maka iha hela Suiça, delega ona Vise Prezidenti Aleixo da Silva Gama “Cobra” ho Sekretariu Jeral Amandio mai Singapura hodi buka hatene kona ba kazu ne’e.Viva.co.id

.