XANANA MAK FORSA VI GOVERNO

.

Jornal Nacional Diário - 22 de maio de 2015

Governu ne’e sei labele moris hodi halo buat ruma ba rai no povu ida ne’e, kuandu laiha eis Primeiru Ministru Kay Rala Xanana Gusmão.

“Ida ne’e realidade, tanba se mak hili Primeiru Ministru foun, no se mak hili membru Governu ne’e tomak, Xanana mak hili. Entaun sestu Governu ne’e labele moris sem Xanana. Realidade se Xanana laiha agora, sestu Governu ne’e mate,”informa eis deputadu husi Partidu KOTA, Manuel Tilman ba Jornalista sira iha nia kna’ar fatin Hotel Beach Garden Dili, Kinta (21/5).

Ba Manuel Tilman, sestu Governu ne’e iha Primeiru Ministru Rua, ida mak Xanana Gusmão no ida mak Rui Araújo. Maibé Tilman mós louva Xanana Gusmão ninia korazen, tanba Xanana husik ninia kaben ho nia oan sira iha Australia ne’eba, hodi nia iha Timor Leste fera ulun atu hadia buat hotu.

“Ha’u hanoin se mak terus bo’ot iha rai ida ne’e agora mak, katuas Xanana duni, tanba hare ba osan sira ne’ebé gasta sai arbiru deit, povu se kiak nafatin, entaun Xanana senti ladiak, tanba nia mak lider númeru 1 iha rai ida ne’e,”rekoñese Manuel Tilman.

Nia haktuir, Xanana mak terus uluk to’o agora rai Timor Leste ne’e independensia tiha ona, maibé buat hotu la’o sabra’ut hela hanesan ne’e, entaun nia (Xanana) senti ladiak.

Tanba ne’e, Tilman dehan, kuandu Xanana mak ses husi Primeiru Ministru Rui Araújo nia sorin, entaun sestu Governu ne’e sei monu, Timor Leste tama ba eleisaun antisipada.

Tilman mos esplika, formasaun sestu Governu ne’e, la tuir konstituisaun, tanba artigu 106 iha konstituisaun RDTL hatete katak, Primeiru Ministru ka Governu foun ne’e, forma husi partidu mais votadu. Bainhira sira hili ona Primeiru Ministru no hetan aseitasaun husi Prezidente da Repúblika, mak foin fó posse ba Primeiru Ministru foun ne’e.

“Maibé ida ne’e lahalo hanesan ne’e, Xanana mak hili Primeiru Ministru no Xanana mak hili ministru sira, Prezidente da Repúblika fó posse loron ida deit,”afirma Tilman.

Entaun Tilman dehan, buat sira hanesan ne’e sei konfuzaun hela, Xanana Gusmão dadauk ne’e buka hela dalan atu oinsa mak bele hadia tiha buat ne’e.tap

.