Jornal Nacional Diário - 29 de maio de 2015
Prezidente Repúblika (PR), Taur Matan Ruak, promete katak, nia parte hamutuk ho Ministru Planeamentu Investimentu Estratéjiku, Kay Rala Xanana Gusmão, sei la husik problema veteranus nian ba jerasaun foun atu ulun moras rezolve.
PR Taur hateten, problema veteranus ne’e nia eskalaun bo’ot duni atu rezolve tanba iha veteranus balun halo falsifikasaun dokumentus hodi hetan pagamentu. Maibe problema ne’e sei hakotu atu nune’e jerasaun foun sira tuir mai labele preokupa tan.
“Problema veteranus nian ne’e ha’u hamutuk ho maun Xanana lakohi husik ba ita nia oan sira tuir mai ne’e, husik sira ukun no haree ba dezenvolve buat seluk ba rai ida ne’e,”deklara PR Taur hodi responde komunidade Suku Samara, Postu Administrativu Hatulia, Munisípiu Ermera nia preokupasaunn kona ba problema veteranus, Kuarta (27/05).
PR Taur hatete, nia rasik hakarak veteranus balun tenke tama tiha Prizaun liu-liu veteranu sira ne’ebé halo falsifikasaun dokumentus.
Eis Gerileiru ne’e dehan, veteranu sira ne’ebe falsifika dokumentu kuandu hetan sei lakon ninia pensaun.
Tuir lei veternus nian katak, sira ne’ebé falsifika dadus kuandu lori ba Tribunal sei lakon direitu, tanba ne’e labele falsifika.
“Veteranu sira bele bosok ohin maibe loron ruma sei deskobre. Ha’u husu atu koalia lia los no ita la bele inventa, hotu-hotu dehan dadus lalos, liu-liu responsavel sira, ita tenke halo esforsu hodi rezolve,” dehan Xefi Estadu ne’e hodi kontinua hateten problema vetaranus ne’e la’os deit iha Ermera maibe iha Munisípiu hira ne’e enfrenta hotu.
Iha fatin hanesan liu husi sesaun dialogu, komunidade Suku Samara Idelfonso Maria da Conceição, preokupadu los kona ba problema veteranus falsu no veteranus lolos.
“Ha’u husu kona ba rezistensia ikus ne’e ami rona veteranus falsu halo ami dúvida husu esplikasaun kona ba veteranus falsu no veteranus lolos, atu ami bele kompriende,”dehan Idelfonso.Nev
.
Sem comentários:
Enviar um comentário
Nota: só um membro deste blogue pode publicar um comentário.