Lu-Olo: Lolos Vicente Guterres rezigna aan

.

Timor Post - 21 de maio de 2015

DILI—Prezidente partidu FRETILIN, Fransisco Guterres Lú Olo afirma, tuir loloos iha inísiu bainhira Vicente Guterres atual Prezidente Parlamentu Nasionál (PN) hetan karta notifikasaun hosi Tribunál, di’ak  liu rejigna án hodi hein ba hasoru justisa.

Eis Prezidente Parlamentu Nasionál (PN) iha Primeiru Governu Konstitusionál ne’e hatete, hanesan sidadaun di’ak  ida no fígura públiku  ida, Vicente Guterres tenke prontu  atu ba hasoru kualker situasaun, liuliu  atu ba presta deklarasaun iha Tribunál.

 Atu deside dehan sala ka lós, Vicente Guterres tenke ba hasoru justisa no desizaun ikus iha Tribunál.

 “Loloos ne’e senhor Prezidente PN, desde nia hetan indisius de akuzasaun kona-ba korrupsaun ne’e devia iha momentu ida ne’eba nia prontu  rejigna án hosi  nia kargu ne’e para depois atu bele hein ba juga no ba hatan iha Tribunál. Tantu ida ne’e ho dignidade liu do que ita hadau malu atu hasai ka lahasai imunidade to’o agora Parlamentu deside lahasai nia imunidade. Ladun kmanek kuandu atu halo ida ne’e. loloos ne’e Prezidente Parlamentu rejigna án iha momentu ida ne’eba kedas hodi hein de’it  atu ba hatan iha Tribunál,” dehan Fransisco Guterres Lú  Olo iha Comite Central FRETILIN, Tersa (18/05).

 Nia dehan, Parlamentu hanesan orgaun para atu foti ka lafohi desizaun para atu hasai imunidade, maibé tenke deside liu hosi  desizaun orgaun nian.

“Ba kazu ida ne’e (partisipasaun ekonomia) kastigu tinan rua ba kraik. Se tinan rua ba kraik ne’e Parlamentu iha kompetensia atu hasai ka lahasai imunidade. Se tinan rua ba leten, prontu  ne’e tuir lei automatikamente hasai kedas,”esplika Lú  Olo.

Karta notifikasaun hosi  Tribunál oras ne’e iha ona Vicente Guterres nia liman, maibé seidauk baixa ba iha Komisaun espesializada atu deskute.

Tuir Lú  Olo, kuandu karta notifikasaun ne’e haruka ona ba iha Prezidente Parlamentu Nasionál, Vicente Guterres hanesan arguido ida, tenke ajenda ona.

“Tenke ajenda ona no bolu xefe bankada sira hotu reuni para atu bele Parlamentu sira bele deside,”sujere Lú  Olo.

Entertantu, kona-ba deklarasaun hosi  Parlamentu ne’ebé maka hatete katak, iha konferensia lideres bankada sira konkorda hodi deside seidauk hasai imunidade ba Vicente Guterres nian, tanba funsionamentu Parlamentu nian, tanba ne’e bainhira mandatu remata maka foin ba hatan iha Tribunál.

“Se liu hosi  konferensia lideres bankada maka foti desizaun ida hodi lahasai imunidade Vicente Guterres nian, ha’u hanoin ida ne’e la vale ida, seidauk iha valor porque ne’e la’ós  orgaun Parlamentu nia desizaun, se liu hosi  de’it  konferensia lideres bankada maka dehan labele hasai lai imunidade, ha’u hanoin ida ne’e bankada ka grupu parlamentar ninia opiniaun karik,”katak eis Prezidente PN ne’e.

Prezidente partidu historiku FRETILIN ne’e mós sujere ba Vicente Guterres kuandu notifikasaun hosi  Tribunál maka nia simu ona, di’ak  liu tau ba meza leten, tau ba ajenda hodi deskute no foti desizaun ba levantamentu imunidade.

 Ministériu Públiku (MP) halo akuzasaun hasoru arguidu sira hanesan Vicente Guterres atual Prezidente Parlamentu Nasionál, eis Diretór Aprovizionamentu Francisco Borlaco atuál SEFI inklui eis Sekretariu Jerál Parlamentar Dr. João Rui Amaral deskonfia involve iha krime partisipasaun ekonomia, ne’ebé fó ajudikasaun direita ba kompañia Midori Motors hodi fornese karreta 65 ba Parlamentu Nasionál.

 Akuzasaun Ministériu Públiku katak arguidu na’in tolu ne’e kontra ona lei aprovizionamentu tanba fó ajudiksaun direita ne’e ba kompaña. (tay)

.