LABELE SUBAR EMA MORAS LEPRA

.

Timor Post - 18 de maio de 2015

DÍLI-Diretora Saúde Munisipiu Dili Agostinha da Costa Segurado husu komunidade no entidades hotu karik identifika moras sempre tenke pasa informasaun ba Ministeriu Saúde (MS).

“Moras lepra ita iha aimoruk atu bele kura, mas moras ne’e kona hela maka la pasa informsaun, entaun susar,”hatete Diretora Saúde Munisipiu Dili Agostinha ba jornalista iha Munisipiu Matadouro Sexta (15/5).

Tuir Agostinha katak, Ministeriu Saúde liu hosi Diresaun Nasional Saúde Publiku sempre fó informasaun ba komunidade sira hetan moras refere bele hakbesik a’an ba fasilidade saúde sira.

Nia dehan, tinan 2015 moras lepra afeita ba ema barak tanba ne’e maka MS servisu hamutuk ho NGO Telemae sira atu buka rezolve moras ne’e.

“Ami nia esforsu agora maka tun ba komunidade nia le’et, ba eskola no fatin hotu atu Identifika no fo advokasia ba autoridade tomak oinsa bele fahe tutan informasaun katak moras lepra bele kura”hatete Agostinha.

Nia husu atu ema hotu-hotu bele koopera ho MS, karik iha moras lepra bele haka’at ba fasilidade saúde atu halo prevensaun, tanba moras ne’e sei da’et tutan ba ema seluk.

Agostinha haktuir tan katak, ema ne’ebé maka hetan moras lepra MS sei trata ho espesifiku atu nune’e bele reduz numeru moras lepra iha Timor Leste.

 “Ita garante katak fasilidade saúde ne’ebé MS estabelese hanesan sentru saúde no hospital bele fo tratamentu ba moras ne’ebé temi”haktuir Agostinha.

Komparasaun moras lepra ho moras seluk iha sidade Dili, moras lepra numeru mos komesa bo’ot anesan moras sira seluk, tanba iha tinan 2014 iha ema hamutuk 37 maka afeita moras ne’e. (gus)

.