KOK konvida L7 no ema seluk besik Mauk Moruk ba reuniaun ohin

.

Timor Hau Nian Doben- 04 de maio de 2015

Tuir informasaun ke Timor Hau Nian Doben hetan, ohin membru balun rezistensia nian ba hasoru malu ho Lere Anan Timur no Júlio Hornai, iha Fatuhada, Díli, tanba Komandu Operasaun Konjuntu (KOK) desconfia sira fo'o suporte ba Mauk Moruk.

Tuir porta-voz Konselhu Revolusaun Maubere, Xabilako, nia dehan katak KOK konvida ema balun hodi ba hasoru ho sira tanba sira deskonfia katak ema sira ne'e mak subar no fo'o han lider Konselhu Revolusaun Maubere - Fretilin Movimentu, Mauk Moruk.

 "KOK ho naran HANITA, konvida L7, Labarik, Angela Freitas, Gil Fernandes, Aitahan Matak, Julio Metiaut, Ijildo Gama, Manuel Makaas, Lito Rambo, Carlito Breok, Tino 2, Frederiko Kiak, Luis Loibale, atu partisipa iha enkontru Loron 4 Maio tuku 09.0 dader fatin Fatuhada-Dili, tamba deskunfia naran sira ne mak apoio hodi hodi subar no fo ha'an Mauk Moruk ho nia membru," dehan Xabilako.

 Foin lalais Timor Hau Nian Doben koalia hosi via telefone ho Mauk Moruk no nia konfirma katak reuniaun ne'e sei akontese duni.
.
 "Lere no Júlio Hornai husu ba hau nia maun (L7) no Angela Freitas ba sira dehan ba KOK katak sira fo'o duni apoiu ba sir. Hau dehan ba hau nia maun para la ba, maibé hau nia maun dehan mai hau ke nia ba hasoru ho Lere no Júlio Hornai no nia ba dehan ba sira katak la konkorda ho operasaun KOK halo hasoru hau", dehan Mauk Moruk.

Semana kotuk Komandante L7 dehan ba media Timor-Leste katak Governu no Parlamento Nasional hakarak "hakiak ditadura" iha rai ne'e ho sira nia rezolusaun sira hasoru veteranus.

 "Rezolusaun ne’ebe maka Governu hasai no hetan aprovasaun unaminidade husi Parlamentu Nasional hodi buka tuir armas ne’ebe maka deskunfia veteranus sira sei rai subar, hanesan aktu ne’ebe maka Governu ho PN “futu lia” hodi hakiak ditadura iha Republika Democratico de Timor Leste (RDTL)", haktuir L7 ba Jornal Nacional Diário kinta feira liu ba.

.