KOK KONTINUA OPERASAUN BA MAUK MORUK

.

Timor Post - 18 de maio de 2015

DILI—Komandante Jerál  Polísia Nasionál Timor-Leste (PNTL), Komisario Júlio da Costa Hornay hatete, Cornelio Gama L-7 iha direitu atu ko’alia, maibé hosi Komando Operasaun Konjunta (KOK), kontinua to’o alkansa objetivu.

“Señor L-7 ko’alia ne’e verzaun ninian no nia senti saida maka  nia hanoin, mais planu Komando Operasaun Konjunta, klaru ke la’o nafatin hanesan Maijór Jeneral ko’alia ona iha televizaun katak operasaun konjunta la’o nafatin to’o alkansa objetivu,” Komisario informa ba jornalista sira iha Kuartel Jerál  PNTL, Sesta, (15/5) relasiona ho deklarasaun L-7 ne’ebé dehan sei la-kopera ho KOK atu halo aprosimasaun ba nia alin Paulino Gama Mauk Moruk.

Eis Komandante Sentru Formasaun Polísia ne’e hatutan, desde ke señor MM seidauk aprejenta ninia-án ou seidauk kopera ho seguransa para bele ba tribunál hodi hatan ba aktus ne’ebé nia halo, operasaun sei la-nafatin.

“Enkontru foin lalais ne’e atu fó oportunidade ba família  atu aproxima señor Mauk Moruk durante 10 dias, maibé señor L-7 deklara nia hakarak husu retira operasaun mais operasaun iha ne’eba ne’e la’os atu baku ema arbiru,”Komisariu Júlio esplika.

Tuir Júlio, se señor L-7 deside nia sei la-kopera  ho KOK ne’e ninia verzaun no ne’e ninia direitu atu ko’alia saida de’it, mais KOK ne’ebé ezekuta orden governu ninian la’o nafatin.

“Operasaun ba segundu faze ne’e la’o hela no orsamentu ba operasaun segunda faze ne’e orsida sei tur ho governu para bele saida,”katak tan.

Nia dehan tan, orsamentu primeira faze ninian, orsamentu sira ne’e uza ba sosa ekipamentos maka  barak liu, agora orsamentu ba segunda faze operasaun ne’e sei la barak, maibé sei sustenta de’it pesoal iha operasaun.

Antes ne’e, Eis Komandante Rejiaun III, L-7 hatete sei la-kopera tan ho KOK kuandu prolonga tempu ba nia atu halo aproximasaun ba MM.

Entertantu, durante fulan ida resin, KOK kaptura ona membru Konsellu Revolusaun Maubere (KRM),hamutuk 395 no hela de’it MM ho Lemorai.

“Sira ne’ebé maka  entrega-án no kapturadus hamutuk 395. Hosi numeru ne’e nain 11 maka  hetan prizaun preventiva, nain 17 aprezenta periodika, nain 10 liberta no sira 356 halo identikasaun,”Komandante PNTL Munisipiu Baucau, Superintendenti, Justinho Menezes dehan ba jornalista sira iha Kuartel Jerál  PNTL, Sesta, (15/5).

Nia hatutan, elemento MM 395 ne’e hosi grupu KRM, CPD-RDTL no  bua malus. “Kona-ba paradeiru Mauk Moruk, ami la-hatene kuandu ami hatene ami halo serku ona ba nia. Ne’ebé agora hela de’it Mauk Moruk ho Lemorai maka  ita seidauk kaptura, maibé sira seluk ne’e ita kaptura hotu ona,”nia hatete.

Tuir nia katak, durante prosesu investigasaun ba grupu illegal sira ne’e hosi komando mos husu tuir ba sira kona-ba paradeiru MM, maibé sira rasik hatete la-hatene.

“Sira nia resposta maka  la-hatene no la-hare Mauk Moruk nia paradeiru, tanba problema ne’ebé akontese iha Lalulai no Saelari sira halai namkari no la-hetan malu. Ida ne’e informasaun ne’ebé ami hetan hosi sira,”nia esplika.

Iha parte seluk nia mos rejeita KOK halo violasaun direitos humanus ba komunidade sira durante operasaun. “Besik fulan rua resin ona ha’u seidauk simu keixa ida hosi sidadaun ida dehan PNTL ho F-FDTL halo violensia ou intimidasaun, ne’e laiha,”nia hakotu.

Antes ne’e, Antes ne’e, Xefi Estado Maior Jeneral F-FDTL, Maijór Jeneral Lere Anan Timur hatete, MM agora subar iha vila laran.

“Agora Mauk Moruk subar iha ailaran laiha ona tanba ninia elementu sira ne’ebé apoio ne’e mai hotu ona, agora nia subar fali iha vila, iha fali uma ida ne’e maka  problema uma ne’e la’os oituan de’it,”Maijen Lere dehan ba jornalista sira iha Palasiu Prezidensial, Kuarta, (13/5), hafoin enkontru ho Prezidente Repúblika (PR), Taur Matan Ruak.

Labele Polítiza Kazu

Entretantu, Diretór Asia Justice And Rights (AJAR) husu MM atu kopera no entrega ba prosesu justisa. “Ha’u hanoin ezijensia ne’ebé maka  atu halo diálogu  ne`e buat ketak ida, tanba relasiona ho lian naksala ho Xanana atu rezolve prolema polítiku, sosial, no ekonomia, maibé prosesu la’o tuir ninia dalan, labele kahur malu, ”José Luis Oliveira dehan ba diariu ne’e, foin lalais iha ninia servisu fatin.

Tuir AJAR nia haree, prosesu justisa ba MM tenki kontinua relasiona ho aktus ne’ebé akontese iha postu administrativu Laga, munisipiu Baucau.

Nia hatutan, diálogu  entre lian naksala, tenki halo tuir regras normais oinsá bele asegura ho justu, vontade, livre, ho konsensia atu rezolve.

“Bainhira iha duni diálogu  tenki prepara kondisoens hodi labele akontese fali hanesan iha tinan kotuk iha Sentru Konvensaun Dili,”afirma nia. Oliveira realsa, rezolve problema la’os ho dalan polítika.

Sikun seluk, deputadu Arão Noe hosi bankada CNRT hatete, KOK sei la-retira tanba estadu ne’e la’os ko’alia ema ida ho ida. Maibé, estadu ninia desizaun maka  atu halo operasaun, ne’e duni MM tenki kopera ho estadu no justisa.

“Mauk Moruk tenki entrega-án ba estadu, nune’e bele submete ba prosesu justisa. Tanba, estadu ne’e direitu demokratika tenki opta, lei maka  regula sé maka  sala no loos, “deputadu ne’e afirma.

Nune’e mos, Inocencio de Jesus Xavier nudar membru Foram husu ba estadu, liu-liu orgaun judisiariu hola medida hodi kontribui ba prosesu.

“Ha’u lakohi Timor-oan labele atu fakar ran iha ninia rain rasik hanesan iha tinan 1975-1999 no ikus iha tinan 2006, liu hosi dalan diálogu  maka  uniku liu atu buka solusaun no atu justifika, ”katak nia.

Maibé, nia realsa, diálogu  la’os atu taka dalan ba prosesu justisa, tanba diálogu  buat ketak ida, nune’e mos prosesu justisa. (jos/jxy)

.