KAZU CALISTRO, XANANA KONFIRMADU SAI SASIN

.

Timor Post - 22 de maio de 2015

DÍLI—Xanana Gusmão, Longuinhos Monteiro ho Cirilio Cristovão konfirmadu sai sasin ba kazu Calistro Gonzaga eis Komandante Servisu Investigasaun Kriminál (SIK) Polísia Nasionál Timor-Leste (PNTL). Julgamentu sei hala’o iha loron 30 fulan-Juñu 2015, tuku 09:00 iha Tribunál Distrital de Díli.

“Ha’u hetan informasaun hosi fontes konfirmadu informa katak, eis Primeiru Ministru Xanana Gusmão  ho Eis Komandante Jerál  PNTL, Longuinhos Monteiro sei marka prezensa iha loron 30 Juñu hodi sai sasin ba kazu Calistro Gonzaga,” Sergio Quintas hosi Defensória Públiku ne’ebé fó asistensia ba Calistro Gonzaga dehan ba diariu ne’e iha TDD, Kinta, (21/5).

Nia dehan, sasin atual Ministru Planeamentu Investimentun Estratejiku, Xanana Gusmão, Ministru Interior, Longuinhos Minteiro ho Ministru Defesa, Cirilo Cristovão, sira nian prejensa iha audensia julgamentu importante atu diskobre lia-loos ba material.

“Hosi fontes konfirma ne’e informa sira nain tolu disponivel ona, partisipa direta hodi fó sasin iha tribunál ba kazu Calistro Gonzaga. Tanbá iha tinan kotuk juiz do prosesu hatun pena ba arguidu Calistro Gonzaga ho tinan sia prizaun. Maibé, juiz la-haree provas ne’ebé mak parte defesa aprejenta,”Sergio hatutan.

Nia hatutan, laiha ekilibru entre ministériu públiku ho parte defesa. Iha ne’e, juiz kontra ona prosesu kontraditorio ho hafoin desizaun koletivu ne’ebé juiz hatun, defesa halo pedidu rekursu, foin Tribunál Rekursu hatun rezultadu ba Tribunál Distrital para atu halo repetisaun hodi halo apuramentu ba deklarasaun sasin parte defesa nian.

Fontes konfirmadu ne’ebé diariu ne’e asesu iha tribunál informa, posibilidade bo’ot Almeiro Magno mos sei sai sasin iha kazu Calistro Gonzaga, tanba nudar sasin ba xavi.

“Almeiro nudar sasin hosi ministériu públiku, maibé posibilidade bo’ot nia mós sei fó sasin iha kazu Calistro sobre nia koñesementu,”fontes ne’e komenta. (max)

.