Cowboy: Ha’u Rende Atu Kontribui Ba Justisa

.

Jornal Nacional Diário - 11 de maio de 2015

Domingos Boavida ‘Cowboy’ ne’ebé Komando Operasaun Konjunta (KOK) deklara hanesan membru prinsipal Konselhu Revolusaun Maubere (KRM) ne’ebé lidera husi Mauk Moruk (MM) hateten, nia rende ba KOK atu kontribui ba justisa.

Maske KOK dehan Cowboy nu’udar membru KRM, maibe Cowboy rezeita hodi dehan katak, nia membru Conselho Popular Defesa-República Democratica de Timor-Leste (CPD-RDTL), la’os membru KRM hanesan ema barak hateten.

“Ha’u deklara tiha ona iha Tribunal ha’u membru ha’u laos KRM, tanba iha abaixa asinadu KRM nian ha’u la iha asinatura,”esplika Cow boy ba Jornalista sira liu husi konferensia ba imprensa, Sesta (08/05/2015), iha salaun enkontru Kuartel Jeral F-FDTL, Fatuhada, Dili.

Cowboy mós husu ba públiku labele konfundi, tanba nia laos mai rende ba KOK, maibé hakarak atu ko’opera ho parte seguransa atu nune’e labele hamosu konfrontu hodi tuir prosesu justisa.

“Sira konfundi rende ne’e parese ita tiru malu ita oho malu forsa la to’o rende ne’e oin seluk, deskulpa. Ha’u husu mós ba membrus sira katak, lalika rona buatus dehan ha’u rende mai iha ne’e baku, tuku, tebe ne’e lae. Ha’u mai seguru vida, kuidadu ha’u nia saude, aban (ohin) loron to ha’u ba hatan desizoens ne’ebé maka Tribunal hato’o mai ha’u,”katak Cowboy.

Cowboy hatutan, durante nia moras halo tratamentu iha Hospital nia la iha kontaktu ho MM, maibé antes nia dehan, nia hetan kovite husi KRM hodi ba han hamutuk iha loron tinan foun.

“Ha’u hakarak hateten iha momentu ne’eba ha’u iha mas ha’u atu involve para hadau pistola lae.   Diak liu husu ba pistola nain membru PNTL nain rua sei moris hela la mate, ne’ebé Jornalista sira ba husu sira nain rua, sei’e maka foti pistola ne’e se maka salva sira nain rua,”tenik Cowboy.

Ba oportunidade ne’e Cowboy husu ba Prezidente KRM Mauk Moruk atu ko’opera ho Estadu oinsa atu bele loke dialogu oinsa bele koopera ho justisa.

“Ha’u hanesan Veteranus ida ne’ebé mak uluk partisipa ba luta ida ne’e ha’u ho membru tomak ba hasoru malu sua exelensia Przsidente Repúblika no sr. Jeneral no Komando jeral PNTL hodi ita buka dalan diak ida iha tempu badak nia laran para habadak tiha problema ida ne’e, atu nune’e labele afeta ba jerasaun foun ida ne’e,”haklaken Cowboy.

Hatan ba deklarasaun Cowboy nian ne’e Komandante Jeral PNTL Komisariu Julio Hornai informa katak, Cow Boy bele deklara an katak nia la involve iha grupu KRM maibé nia iha grupu CPD-RDTL lalos karik.

“Tamba iha estrutura ne’ebé maka KOK hetan ne’e, Cowboy mos involve-an hotu iha laran no atividade hirak ne’ebé maka MM halo Cow Boy seimpre iha hotu, no hatais farda kompletu, ida ne’e signifika katak Cowboy mos sai hanesan Membru importante ida iha laran, no nia mós iha hotu estrutura KRM,”katak Julio Hornai.

Julio Hornai realsa katak, iha deklarasaun Cowboy nian dehan, Cowboy durante ne’e la hasoru malu ho Mauk Moruk, no nia hasoru dala ida deit ne’e la los.

“Ami iha evidensia ne’ebé forte katak, Cowboy hanesan membru importante MM nian,”tenik Julio Hornai.

Cowboy membru KRM no atividade ne’ebé maka KRM halo nia sempre iha laran nia fotografia mós iha ne’e sai hanesan evidansia.

“Ita atu labele fiar nia no Cowboy bele deklara katak, nia laos membru KRM maibé nia membru CPD, ida ne’e hanesan versaun ninian, maibé evidensia la’o hanesan ne’e, nia membru importante MM nian,”dehan Komjer hodi resposta deklarasaun Cowboy. nax

.