POLISIA TIRU MATE JOVEN IDA IHA LAGA

.

Timor Hau Nian Doben - 09 de abril 2015

Tuir informasaun Timor Hau Nian Doben simu foin lalais hosi fonte ida iha Baucau, nia alega  katak polisia tiru mate joven ida horseik, iha Boleha, area Laga, distritu Baucau.

"Polisia tiru joven ida horiseik iha fatin Boleha, area Laga, joven nia naran Izidu", fonte refere haktuir.

"To'o agora seidauk hasai mate isin tamba monu tama ba rai kuak mota, fatin Boleha iha Laga area", dehan tan.

Tuir informasaun balun ke blogue ida ne'e hetan, populasaun iha area Laga, Kelikai no Baguia moris loron-kalan ho tauk no paniku tanba polisia ninia hahalok.

Tuir señor ida ke dada lia ho Timor Hau Nian Doben ohin dader, nia dehan:

""Ami tauk no trauma tanba polisia loron-kalan sira halo intimidasaun ba povu tanba sira hanoin ami subar Mauk Moruk no ninia membru sira. Ami tauk sira oho ami. Boot sira mak halo konflitu no ami povu kiik mak lori todan", dehan señor ba Timor Hau Nian Doben.

"Ami husu ba governu no polisia hodi rezolve kazu ne'e lalais, ami lakohi terus tan. Ami mos husu ba BOP hodi hapara sira hahalok aat hasoru povu inosenti. Tanba sa mak ami mak lori todan?", nia remata.

.