KRPM kondena makaas BOP nebe tiru joven tolu iha Baucau

.

Xabilako - Porta-Vos KRPM-FM

Konsellu Revolusaun Povu Maubere - Fretilin Movimentu kondena makaas hahalok Polisia hosi Batailaun Ordem Publika nebe tiru joven nain tolu iha Baucau Vila.

Hahalok kriminozu BOP nian  rezulta ema kanek todan, tamba laran moras ho projetu rezolusaun ilegal nebe lafolin iha operasaun, tamba fakar osan barak povu nian ba rezolusaun hodi buka Mauk Moruk  ho nia membru, maibe folin karun demais, ikus mai povu inosente nebe sala laek mak sai vitima.

BOP ninia hahalok hanesa militar indoneziu sira, halo torturasaun no hakanek povu inosente. Timor Oan sira luta hasoru Indonezia tinan 24, maibe iha tempu Ukun Rasik An ita nia ema halo hanesan TNI sira.

KRPM-FM husu dala ida tan ba governu ilegal ne'e hodi kontrola polisia no militar sira no hapara sira nia hahalok kriminozu hasoru povu inosente sira.

Tanba sa polisia la ba kaer koruptor sira nebe tur iha governu nia laran no naok povu nia osan? Tanba sa ba halo intimidasaun hasoru povu inosente? Povu terus barak ona, iha tempu Ukun An sira sei moris iha susar no mukit nia laran tanba governu la tau matan ba sira no sei iha korajen ba halo torturasaun no intimidasaun ba sira? Ida ne'e sala kedas. Governu bolu Mauk Moruk no ninia membrus terorista maibe sira nia hahalok mak terorista nian. KRPM-FM la halo torturasaun ka intimidasaun ba povu inosente.

KRPM-FM kondena makaas hahalok hosi sese deit kontra povu inosente. Ami husu ba Prezidente Republika hodi  kontrola situasaun ne'e no hapara lalais hahalok at no kriminozu husi BOP hasoru povu inosente.

Obrigado barak  no Haksolok Wain ba Loron Paskua ba sarani hotu iha Timor-Leste no mundu tomak.

.