Dom Basilio do Nascimento: “KOK Tenki Kaer Lalais Ona Mauk Moruk”

.

Jornal Nacional Diário - 27 de abril de 2015

Bispo Diocese Baucau, Dom Basilio do Nascimento, husu ba Komando Operasaun Konjunta (KOK) atu kaer lalais Mauk Moruk ho nia grupu, tanba oras ne’e dadauk povu iha Municipiu Baucau, terus liu ona.

Dom Basilio dehan, buat ne’ebé maka povu iha Municipiu Baucau nian ne’eba lamenta ne’e, tanba sira ladun bok an, tanba operasaun ne’e.

“Sira tenki buka atu kaer lalais, atu povu mós bele la’o avontade. Situasaun ne’e halo povu la’o atu buka moris ladiak,”dehan Dom Basilio do Nacimentu iha Palacio Governu, Sesta (24/4), hafoin hasoru malu ho Primeiru Ministru Rui Maria de Araújo.

Dom Basilio hatutan, situasaun hanesan ne’e, sira tenki kontrola duni, maibé operasaun ne’e, lao durante fulan ida ona, no povu sira mós senti katak, buat ne’e demais ona, baihira maka kaer los. Dom Basilio dehan, nia mós lamenta tebés ho hahalok Komando Operasaun Konjunta nian, tanba estraga povu nia sasan, no baku povu ne’ebé maka lahatene buat ida.

Povu sira nia sasan, hanesan odamatan, janela, sanan, bikan no buat seluk tan maka KOK tebe rahun, wainhira pasa revista tama sai uma. Dom Basilio esklarese, povu iha Municipiu Baucau, dadauk ne’e labele bok an atu buka sira moris lor-loron, tanba tuku lima lokraik deit, sira tenki sulan ona iha sira nia uma laran.

Dom Basilio dehan, nia triste tebes ho situasaun ida ne’e, tanba dala barak ona povu ki’ik sira ba hato’o keixa ba nia, relasiona ho hahalok KOK nian.

 “Katekista sira hato’o keixa mai hau, no membru Diocese nian, ba komisaun Justisa e paz mós, ba halo investigasaun hodi hare. i hau dehan ba sira katak, kuandu iha sasan hanesan ne’e, tenki buka atu halo ba oin, liu husi kanais sira ne’ebé maka iha atu buat hirak ne’e, bele to’o iha leten ba,”tenik Dom Basilio.tap .

,