REJIGNASAUN PM XANANA HO HARII VI GOVERNU, HEIN BOLA MANAS LA SUNU TMR NIA LIMAN

.

João Almeida

Husi: João Almeida

Dinamika polítika iha sosiedade Timor-Leste. Wanhira sosiedade tomak prekupadu ho situasaun seguransa interna. Iha ne’ebé ejije komponente tomak Estadu nian hodi ezerse nia funsaun tuir Konstituisaun nia haruka. Iha tempu hanesan mosu situasaun rua dada ema hotu nia atensaun. Premeiru, remodelasaun ka re-estruturasaun ba Governu. Segundu rejignasaun Premeiru-Ministru nian.

Situasaun rua ne’e halo membru Governu sira iha Bloku Governu Koligasaun (BGK) ne’ebé forma husi Partidu CNRT, PD no Frente Mudansa preokupadu tebes. Premeiru, iha reasaun balu hatudu la simu remodelasaun ka re-estruturasaun ne’ebé sei akontese. Portantu distinu BGK nian sei hakotu iha tinan 2017. Tuir komprimisiu ne’ebé halo desde tinan 2012 hodi forma BGK. Nune’e mos membru Governu balu hato’o kedas karta rejignasaun tuir envelope ne’ebé Premeiru-Ministru hato’o ba sira.

Situasaun segundu, tantu partidu sira ne’ebé forma BGK no sosiedade tomak husu Premeiru-Ministru labele rejigna-an no halo deit remodelasaun ka re-estruturasaun. Husi partidu CNRT rasik hato’o katak iha rezolusaun konferensia estra-ordinairu partidu nian tinan 2014 la iha rejignasaun maibe halo deit remodelasaun ka re-estruturasaun.

Maibe desizaun rejigansaun Premeiru-Ministru nian dalaruma irrevesivel. Iha ne’ebé tinan 2015 tarde liu ona, hanesan Premeiru Ministru hato’o tiha ona iha tinan 2013. Nune’e desizaun ida ne’e mak akontese lolos iha tinan 2015 no hato’o ona karta rejignasaun ba Prezidente da Repúblika.

Oinsa distinu BGK? Tuir Konstituisaun RDTL artigu 112) kona-bá Governu nia demisaun, númeru 1) alinea b) hatete kuandu Prezidente da Repúblika simu Primeiru-Ministru nia pedidu atu demite. Nune’e iha loron 5 fulan Fevereiru tinan 2015, Premeiru-Ministru hato’o ona karta rejignasaun ba Prezidente da Repúblika. Signifika katak Governu monu ona, automatikamente BGK la iha ona.

Saida mak Prezidente da Repúblika halo hodi responde ba situasaun ne’e? Pasu dahuluk ne’ebé Prezidente da Repúblika halo tiha ona mak komvoka enkontru Konsellu Estadu tuir Konstituisaun RDTL artigu 112) númeru 2) nia haruka. Segundu, atu harii VI Governu Konstituisional tenke liu husi mekanizmu konstituisional ninian. Nune’e Prezidente da Repúblika sei konvida hikas partidu mais votadu ka koligasaun partidu hodi forma Governu foun tuir Konstituisaun RDTL artigu 85) alinea d) nia haruka.

Nune’e atu forma Governu foun, Konstituisaun RDTL Kapitulu II kona-bá formasaun no responsabilidade Governu nian, artigu 106 hatete:

1. Primeiru-Ministru partidu ne’ebé hetan votu barak liu ka partidu sira iha aliansa ho maioria parlamentár maka hatudu no Prezidente da-Repúblika maka nomeia, rona tiha partidu polítiku ne’ebé iha reprezentante iha Parlamentu Nasionál.

2. Prezidente da-Repúblika nomeia Governu nia membru sira seluk, tuir Primeiru- Ministru nia proposta.
Portantu BGK monu tiha ona desde Premeiru-Ministru hatama pedidu rejignasaun ba Prezidente da Repúblika. Nune’e senariu sira ne’ebé sei akontese hodi forma Governu foun mak premeiru mantein koligasaun CNRT, PD no Frente Mudansa; segundu bele akontese koligasaun foun partidu CNRT ho partidu seluk; terseiru Partidu CNRT hanesan partidu ne’ebé mais votadu bele forma Governu minoria.
.

Razaun sira senariu tolu ne’e bele akontese! Premeiru mantein koligasaun CNRT, PD no Frente Mudansa hodi garante estabilidade politika tuir komprimisu BGK nian iha tinan 2012 hodi la’o to’o iha tinan 2017.
.

Segundu, CNRT bele halo koligasaun foun entre PD ka Frente Mudansa. Maske forma Governu entre partidu rua ne’e ida ho minoria maibe ita hotu akompañia Partidu FRETILIN apoiu nafatin programa Governu nian hanesan akontese tinan rua tutuir malu 2014 no 2015 iha Parlamentu Nasional.

Terseiru, CNRT bele forma Governu minoria ho apoiu Partidu FRETILIN nian iha Parlamentu Nasional hodi la’o to’o tinan 2017. Iha ne’ebé tuir públikasaun media nasional katak Partidu FRETILIN nian membru balu sei tama iha Governu foun ne’ebé sei mai. Konfirma katak, Sekretariu Jeral Partidu FRETILIN Dr. Mari Alkatiri ba media nasional no internasional sira FRETILIN nia membru sei tama iha Governu foun hanesan individual la’os FRETILIN mak tama iha Governu.

Posibilidade seluk bele akontese! Enkuantu partidu mais votadu la konsege forma Governu. Prezidente da Repúblika sei bolu partidu segundu mais votadu hodi forma Governu. Nune’e partidu segundu la konsege mos forma Governu, maka fo ba partidu mais votadu forma Governu minoria. Wainhira aprezenta programa no Orsamentu Jeral Estadu ba Parlamentu Nasional la simu dalarua tuir malu, Governu sei monu nu’udar Konstituisaun RDTL artigu 112) alinea d) nia haruka. Ho ida ne’e eleisaun antisipada bele akontese!

Hakerek Na’in: João Almeida, servisu iha Fundasaun Mahein (FM).

.