PM Xanana Gusmão Labele Rejigna-An, Diak Liu PM Halo Remodelasaun, Re-estruturasaun no Reajustamentu ba Membru Governu

.

Moisés Vicente

Husi: Moisés Vicente Alumni: Universidade da Paz (UNPAZ)-2008 Telefone: +670 77291406

Loron Kmanek ba belun Timor-Leste, ha’u nia artigu ida ne’e hakarak análiza kona-bá knaar Xefe ba Governu-Primeiru Ministru (PM) Xanana Gusmão iha ne’ebé iha semana hirak liu ba fó sai iha mídia nasional no mídia Internasional katak PM hakarak rezigna-an iha Estrutura V Governu Konstitusional RDTL periodu 2012-2017. 

Baze legal iha Lei-Inan Konstituisaun Repúblika Demokrátika Timor-Leste (KRDTL) iha ne’ebé kapitulu II Formasaun no Responsabilidade artigu 106 kona-bá Nomeasaun alinea ida hatete “Primeiru Ministru hili hosi partidu ida ne’ebé iha votu barakliu ka hosi aliansa partidu sira-ne’ebé nia ema barak iha Parlamentu no iha nomeasaun hosi Prezidente-Repúblika, wainhira rona tiha partidu politiku sira ne’ebé iha reprezentante sira iha Parlamentu Nasional”. Alinea rua dehan nune’e “Membru Governu sira seluk, Prezidente-Repúblika mak sei hili liu husi Xefe-Ministru nia proposta”.

Parte seluk, artigu 112 KRDTL (Demisaun Governu nian) alinea ida dehan nune’e Governu nia knaar remata, wainhira: a) Hahú lejizlasaun foun; b) Wainhira Prezidente-Repúblika simu pedidu demisaun hosi Primeiru-Ministru; c) Wainhira Primeiru-Ministru mate ka hetan susar ba nia isin lolon; d) Parlamentu Nasionál la simu programa Governu nian dala-rua tuituir malu; e) Parlamentu Nasionál la simu aprovasaun ba votu konfiansa; f) Aprovasaun mosaun sensura nian hosi maioria absoluta tomak deputadu ne’ebé sei hala’o knaar nu’udar efetivu. Alinea rua hatete Prezidente-Repúblika sei bele hatán ba Parlamentu Nasionál wainhira tuir kazu sira ne’ebé fó-sai iha númeru uluk no wainhira hatudu katak tenke kaer metin instituisaun demokrátiku sira-nia lala’ok, bainhira rona tiha ona Konsellu-Estadu.

Sanak seluk, tuir Vise Prezidente Parlamentu Nasional (PN), Aderito Hugo, ba jornalista sira iha Parlamentu Nasional Segunda (02/02) hatete Lei la fo dalan ba Primeiru Ministru Xanana Gusmão atu hili fali ema seluk hodi troka nia fatin.

Hanesan Primeiru Ministru nia laiha kompetensia tanba laiha dalan, mais se akontese hau hakarak dehan maka ne’e ita hakarak hatudu sensasi ba mundu katak ita bele halo buat ida ne’ebé maka uniku no difrente ho nasaun seluk. Aderito Hugo hatutan iha kongresu esxtraordinaria partidu CNRT tinan kotuk mos la kolia kona-bá rejignasaun Primeiru Ministru Xanana Gusmão, maibé koalia deit kona-bá atu halo avaliasaun ba V Governu Kontitusional nia servisu, tanba ho numeru Membru Governu bo’ot no todan demais.

Pesoal ha’u nudar ema akademiku nia hanoin, la defende Primeiru Ministru maibé ha’u defende sistema demokrásia iha pais Timor-Leste. No sistema demokrásia iha TL tuir mandatu PM tenke to’o tinan 5 maka foin bele troka, selae ita halimar ho ita nia Lei-Inan KRDTL, tamba votus ne’ebé povu Timor-Leste fó liu husi elisaun jeral to’o tinan 5, la’os fó tinan 2 hobalu. Bazeia ba artigu 112 alinea c) Talvez (kecuali), Wainhira PM mate ka hetan susar ba nia isin lolon. Tuir hau nia observasaun Primeiru Ministru nia kondisaun diak hela. Iha sikun seluk, eis-Deputadu Manuel Tilman esplika “Informasaun PM nia rejignasaun ne’e tuir sistema eleitoral PM ne’e tenke mai husi partidu ne’ebé maka manan maioria iha eleisaun jeral. Kuandu laiha partidu ida mak manan maioria, bele forma bloku ida hamutuk hodi hili PM. Ne’e duni, kargu PM ne’e laos hili husi partidu CNRT maibé husi partidu bloku.

Tanba ne’e, iha sorin ida moralmente no etikamente, PM Xanana tenke kumpri saida maka iha partidu nia estatutu. Ne’e duni, PM Xanana iha obrigasaun atu kontinua PM to’o tinan 2017.” Sorin seluk, tuir Bispo Diocese Maliana Dom Norberto Amaral nia hanoin hatete katak “Seidauk uportunu atu PM Xanana Gusmão rezigna tamba situasaun rai laran hanesan ne’e, presiza ema ne’ebé hakuak ema hotu. Bispo nia pesoal, seidauk oportunu atu PM Xanana rezigna-an konvein nia lori mandatu ida ne’e ba to’o iha tinan 2017. Dom Norberto mos husu povu tomak atu hakmatek iha fatin hodi simu akontesementu saida deit, ne’ebé akontese. Ba akontesementu sira labele hare deit ba parte negativu, mas hare mos ba parte pozitivu. Basa akontesementu sira ne’e sadik ita nia kakutak hodi análiza, saida maka diak ba Timor-Leste.

Kona-bá remodelasaun governu, Bispo Diocese Maliana ne’e dehan nia ladun konkorda tanba buat ne’e iha klaran ona bele iha kebra ida. Tuir Dom Norberto remodelasaun no re-estrukturasaun ida ne’e, iha tinan klaran depois para derepente hodi hasa’e fali foun ne’ebé atu lori programa ba oin ida ne’e presija estudu ida ne’ebé tenki klean.

” Lidun seluk, tuir Viana Joaozito nia hanoin dehan iha Facebook katak “objetivu hosi re-estruturasaun V Governu Konstitusionál mak sei halo Governu sai efisiente no efikáz liutan, atu hare’e mós servisu sira-hotu hodi servi Povu Timor-Leste. Deklarasaun ne’e hasai hosi Governu wainhira Primeiru-Ministru Kay Rala Xanana Gusmão deklara no anúnsia ofisialmente revé númeru kompozisaun Governu hodi ukun to’o iha 2017.

Hare’e ba objetivu ne’e, kestaun re-estruturasaun loloos mak “oinsa” ukun-polítiku sira atu servi povu nune’e bele atinzi lalais mehi povu nian ba moris diak nian, laós kestaun polítika no númeru ukun-polítiku ne’ebé bo’ot deit. Maibe re-estruturasaun ne’e akontese tanba presiza duni ukun ida ne’ebé mak tenke efikáz; katak presiza ho servisu ho fuan, lalais, iha sensibilidade moral, hatene povu nia nesesidade, no mós iha obrigasaun atu servisu maka’as liu tan ba povu hotu-hotu nia moris diak.

Iha tempu tuir mai, re-estruturasaun V Governu sei implika ba iha dezenpregu foun, tanba reduzaun membru Governu kuaze metade, inklui taka instituisaun governu balun sei halo dadaun funsionáriu polítiku sira pániku hosi Xéfe Gabinete, tekníku apoiu Administarasaun Gabinete nian to’o assessor sira ne’ebé mak durante ne’e goza ninia priviléjiu.

” Pesoal ha’u, re-estruturasaun ne’e fó biban mós ba iha teknokrata sira ka lae? Maibé importante tebes atu Primeiru-Ministru fihir no aponta ema tuir sira-nia abilidade no limete mós frustrasaun ema nian wainhira haruka atu husik ninia kargu. Tanba dezafiu tuir mai sei bo’ot liu tan, presiza enerjia barak hodi hasoru oponente polítika iha jogu polítiku ne’ebé hahu dadaun agora.

Primeiru-Ministru iha Governu foun ne’e tenke buka meius oioin hodi halo formasaun propiu ba rekursu polítiku sira tuir nesesidade no abilidade pesoál hodi asume kargu ukun nian. Hodi nune’e objetivu hosi re-estruturasaun labele monu deit ba rai. Ikus liu, fó hanoin ba Xefe-Governu Primeiru Ministru Xanana Gusmão lalika halo karta rezignasaun, se rejigna-an signifika katak V Governu konstituisional ne’e monu, depois ba halo tan eleisaun antisipada ne’e gasta ho montante orsamentu bo’ot demais. Diak liu halo deit Remodelasaun, Re-estruturasaun no Reajustamentu ba Membru Governu.

Nune’e PM hare no hili fali Vice-PM, Ministru/a, Vice-Ministru/a no Sekretariu Estado foun husi bankada Opozisaun partidu FRETILIN bele mai ho ema individual, ka Bloku Koaligasaun Governu-(BKG) bankada PD-CNRT-Frente Mudansa (FM). PM tenke hare ba ema nia Kapasidade, Integridade, Visaun, Sentidu Estadu, Nasionalismu, Patriotismu no seluk tan, para servi povu ho laran tomak.***

Referénsia:

a. Konstituisaun Repúblika Demokrátika Timor-Leste. Asesu iha loron 02 Fevereiru 2015.

b. PR Taur Matan Ruak Seidauk Simu Karta PM Xanana Rezigna-An. Asesu iha Jornal Timor Post, 02 Fevereiru 2015.

c. PR TMR Seidauk Simu Karta Rezignasaun husi PM Xanana. Asesu iha Jornal Suara Timor Lorosae, 02 Fevereiru 2015.

d. Dom Norberto Amaral Seidauk Uportunu PM Xanana Rezigna-An. Asesu iha Jornal Nacional Diário, 02 Fevereiru 2015.

e. Xanana Rezigna Aan, Laiha Impaktu. Asesu iha Jornal INDEPENDENTE, 02 Fevereiru 2015.

f. Prezidente Repúblika Taur Matan Ruak Sei Tetu Rezignasaun PM Xanana Gusmão. Asesu iha Jornal Nacional Diário, 03 Fevereiru 2015.

g. Primeiru Ministru Xanana Rezigna-An Governu Monu, Tenki Hamosu Koligasaun Foun. Asesu iha Jornal Nacional Diário, 03 Fevereiru 2015.

h. Dos Santos, Bendito. Entrevista Pesoal, kona-bá Sistema Governasaun, iha loron 04 Fevereiru 2015.

i. PM Xanana Rezigna-An, Diak Liu Eleisaun Antisipada. Asesu iha Jornal Nacional Diário, 04 Fevereiru 2015.

.