Maun Taur tenke hapara Xanana no Alkatiri jogadas foer

.

Oan Kiak

Ita hotu iha esperansa boot katak horiseik ita bele hahú istória foun iha ita rai doben, ita hotu espera katak Maun Xanana rezigna ninia aan maibé la akontese. Tan ba sa Maun Xanana la rezigna aan? Keta ninia planu la tuir ninia hakarak.
.
Ita hateke de'it ba tatika Maun Mari no Maun Xanana nian no ita bele foti konkluzaun katak sira hakarak halimar ho ita nia Lei Inan nomos ho Maubere Oan. Rui Araújo sira rua hakarak dada nia atu sai PM, maibé hau husu de'it? Tan ba sá mak Rui Araujo ba tur iha PM nia kadeira? Se mak vota ba nia? Uainhira Maubere Oan vota iha 2012, FRETILIN manan eleisaun ka lakon?

Ita nia Lei Inan dehan saida? Se mak iha direitu atu ukun tuir rejultadu eleisain lejislativa nian? Ita moris iha liurai sira nia era ka ita moris iha Estadu Direitu Demokratiku ida?

Tuir ita nia Konstituisaun:

Artigu 112.º
(Demisaun Governu nian)
1. Governu nia knaar remata, wainhira:
a) Hahú lejizlasaun foun;
b) Wainhira Prezidente-Repúblika simu pedidu demisaun hosi Primeiru-Ministru

Karik Maun Xanana rezigna aan, Maun boot tenke deskansa deit, la bele tan hatama ninia kanuru tohar iha governu foun nia laran, tan ba governu atual mono kedas, Maun Taur laiha tan dalan seluk, Maun Taur tenke prepara aan hodi hala'o eleisaun lejislativa foun, la iha dalan seluk. Maun Taur keta tama iha Maun Xanana no Maun Mari jogadas foer.

Se Maun Xanana hakarak halo remodelasaun, asunto ida ne'e Maun Boot niniaa kompetensia duni, iha direitu tomak atu hala'o remodelasaun iha V governu nia laran.

Ha'u mos admira tebes ho CNRT, PD no Frenti Mudansa, sira tuir dei'it Maun Boot no aseita sujestaun Maun Xanana nian hodi hatama Rui Araujo atu sai PM? Rui Araujo nunka bele sai PM iha Timor-Leste iha tinan 2015, tan ba Maubere Oan sei la fo sira ninia votu ba nia. FRETILIN bele nomeia sira nia kandidatu hodi tur iha PM kadeira uainhira sira manan eleisaun ida, imi keta mehi, lohi, no halo jogadas foer hodi ukun, tan ba Maubere Oan seidauk fo fiar ba Partidu FRETILIN ukun ita. Imi hanoin mak hadia imi nia uma laran hodi hasoru ho di'ak eleisaun 2017. Se lae imi sai dala ida tan Partidu Intervensaun ka Oposisaun, maibé, hanesan de'it, naran mak troka, tuir imi nia intrese ka imi bolsu intrese. Ne'e mak FRETILIN ohin loron, sira haluha tiha ona tane as  Maubere Oan nia intrese, Maubere Oan nia mehi.

Maun Taur  keta tama iha Xanana no Alkatiri jogadas foer, Maun Taur povu fo duni sira nia fiar ba ukun ita, tuir dalan legal ida, eleisaun tinan 2012. Hanesan ha'u belun doben ida dehan, sira rua (Xanana ho Alkatiri)  sabraka dodok ona, sira istória ona, uainhira sira ba deskansa ita hotu lalika tristi tan ba era foun ida hahú iha ita rai doben. Maun Taur tenke hala'o ninia knar tui ita Lei Inan la'os lei Maun Xanana ka Maun Alkatiri nian.

Ema hosi FRETILIN bele tama duni iha remodelasaun, maibé la bele sai PM to'o sira manan eleisaun ka halo parte koligasaun ida, to'o agora sira la hola parte koligasaun, tuir ha'u hatene, sira hala'o sira nia knar hanesan Partidu Oposisaun, ha'u iha duvidas boot ke sira hala'o sira ninia knar hanesan Oposisaun, loloos ita tenke bolu sira Partidu Oportunista.

Tuir ha'u hanoin dalan ida ke di'ak teb-tebes mak eleisaun antesipada ida, la'os tempu ona hodi halimar ho Maubere Oan ninia futuru, ita hotu tenke kaer metin ita nia Independensia ke ita manan ho ran no ruin, Independensia ne'e lulik la monu hosi Lalehan, Maubere Oan mak manan hamutuk ho ita nia Asua'in FALINTIL sira.

Ha'u hakarak husu de'it ba Maun Taur hodi tane as Maubere Oan nia intrese no salva ita nia Independensia, hodi hapara ema nain rua hau temi ninia jogadas atu tuir de'it sira nia intrese privadu. Ami fiar katak Maun Taur sei tane as Maubere Oan ninia intrese no mehi.

Mai ita hotu hamutuk  fo fiar ba Maun Taur iha eleisaun 2017 atu sai Timor Lorosa'e ninia Primeiru-Ministru! Timor Lorosa'e presiza ema ida hanesan Maun Taur la'os ema ho pasadu otonomista ida ka mai hosi Partidu FRETILIN 2000, Partidu Oportunista.

VIVA MAUN TAUR!
VIVA MAUBERE OAN!
VIVA FRETILIN 1975!
VIVA FALINTIL!
.