Lere Hakarak Kaptura Ângela Freitas, Longuinhos Prontu Ezekuta

,

Jornal Independente - 29 Janeiru 2015

Xefe Estadu Maiór Falintil-Forsa Defeza Timor Leste (F-FDTL), Majór Jenerál Lere Anan Timur hakarak atu halo kapturasaun ba Prezidente Partidu Traballista, Angela Freitas tanba envolve iha kazu Mauk-Moruk nian.

Komandante Jerál F-FDTL hasai lia hirak ne’e, tanba Ângela Freitas hasai deklarasaun ba públiku hodi fó apoia no sai nu’udar portavós ba Mauk-Moruk nian.

“Kaer uluk Ângela ona. Nia hatene purke nia mós envolve ba kazu sira ne’e,” dehan Jenerál Lere, iha Rezidénsia Asosiasaun Veteranu, Taibesi-Dili, horisehik.

Maijen Lere hateten katak, Ângela Freitas uluk envolve aan iha krize 2006 ne’ebé rezulta sunu uma barak inklui Alfredo Reinado no ema lubuk ida nia mate. Ne’e duni, husu atu labele repete tan erru ne’e.

.
Jenerál Fitun Rua ne’e husu Ângela atu hakmatek iha fatin hodi labele mete ba problema (Mauk-Moruk) ne’e. Kuandu repete fila-fali erru sira ne’ebé uluk akontese, laiha dalan seluk tenke kaptura nia.

“Ângela mós dadaun ne’e iha rezidénsia fiksa, tanba ne’e husu nia atu kuidadu no labele mangame,” tenke Lere.

Eis Komandante Gerrilleiru Rejiaun I ne’e hatene katak, Ângela uluk hela iha Austrália, tanba ne’e la sente sakrifísiu boot ne’ebé povu no FALINTIL sira atravesa iha rai laran. Ne’e duni, husu atu hapara erru hirak ne’ebé liu ona.

Entretantu, Vise Primeiru Ministru, Fernando La Sama de Araújo reprezenta Ministru Defeza Seguransa fó orientasaun ba Komandante Jerál Polisia Nasionál Timor Leste (PNTL) atu diskute mekanizmu mandatu kaputrasaun ba Prezidente Partidu Traballista, Ângela Freitas.

Nia dehan, rezolusaun ne’ebé governu hasai ba Grupu Konsellu Revolusaun Maubere (KRM) sei válidu nafatin atu kaer Ângela Freitas ne’ebé sai portavós ba grupu Mauk-Moruk nian.

“Ângela Freitas tenke kaer duni. Nia agora bebas ‘bersyarat’ hela mak ne’e. Agora tenke kaer. Ha’u husu ba Komandante Longuinhos, ha’u dehan tanba saida mak seidauk kaer nia? Agora tenke ba kaer nia,” dehan nia, iha Palasiu Governu, horisehik.

La Sama de Araújo fó orientasaun ba Komandu PNTL atu kontinua halo operasaun ba ema ne’ebé oras ne’e helik iha grupu KRM hodi kaer hotu membru sira ne’ebé envolve iha krime hodi prosesa tuir lei.
,
La Sama mós fó sai katak, polisia kontinua buka tuir paradeiru Mauk Moruk nian, atu nune’e Mauk Moruk presta sira nia responsabilidade ba iha tribunál kona-ba hahalok saida mak sira halo ona iha estadu ida ne’e nia laran.

Prontu Ezekuta

Fatin hanesan, Komisáriu Longuinhos dehan, iha enkontru informa situasaun rai laran ba Vise Primeiru Ministru. Situasaun la’o hakmatek no la’o ho normál tuir servisu operasaun ninian.

Longuinos dehan, Komandante PNTL, prontu ezekuta orden ne’ebé orienta husi Vise Primeiru Ministru Fernando La-Sama de Araújo.

“Ministériu Públiku (MP) mós bolu ha’u ba haree prosesu sira legál ninian, ha’u hanoin ita prienxe hotu ona rekizitu, agora ita husu responsabilidade sira (Ministériu Públiku) nian hodi enkamiña ba sistema,” tenik Longuinhos.

Hatán kona-ba to’o oras ne’e seidauk kaptura Mauk-Moruk, nia dehan, oras ne’e servisu operasionál PNTL nian la’o nafatin ho Komandu F-FDTL buka deteta fatin balun, inklui kaer mós ema importante sira hodi investiga.

Nune’e, Komisáriu Longuinhos husu ba populasaun tenke fiar nafatin estadu ida ne’e, atu ne’e hotu-hotu kontribui ba estabilidade.

Nia konsidera, Ângela Freitas kontinua provoka beibeik situasaun la di’ak iha rai laran, tanba ne’e tempu besik Ângela sei hetan kapturasaun.

“Ita haree hela no hein tan partisipasaun, see karik nia sala ita lori lei mak sei deside,” teik Longuinhos.

Susar Kaptura Mauk-Moruk

Iha oportunidade ne’e, Xefe Estadu Maiór Falintil-Forsa Defeza Timor Leste (F-FDTL), Majór Jenerál Lere Anan Timur hateten, susar uitoan atu halo kapturasaun ba Paulino Gama “Mauk-Moruk” tanba nia nu’udar eis gerrilleiru ne’ebé hatene tátika atu subar aan.

“Ema sira Cowboy sira ne’e, ema ne’e hotu -hotu mai husi gerrilla, ita atu kaer sira ne’e difisil uitoan,” tenik nia

Maski nune’e, Eis Komandante Gerrilleiru Rejiaun I ne’e hatene katak, Mauk-Moruk la subar ona iha ai-laran. Deskonfia subar ona iha vila laran, maibé seidauk iha informasaun klaru, tanba ne’e presiza informasaun barak tan.

Tuir nia, relasaun familiár no emosionál atu denunsia malu mós sira ta'uk. Nia fó ezemplu, ema ruma dehan, Mauk subar iha Bairru-Pité, ema ne'ebé informa ne’e mós kuidadu, la’ós joven timor-oan mak atu baku mate ema ne'ebé informa ne’e, mais família husi Mauk nian.

Kona-ba operasaun entre F-FDTL no PNTL iha Laga-Baukau, Jenerál Lere dehan, ne’e la’ós operasaun konjuntu, maibé F-FDTL reforsa de’it servisu PNTL nian.

.