Veteranu balu organiza manifestasaun kontra tribunal

.

Timor Hau Nian Doben - 13 de novembro de 2014

Agora dadauk veteranu balu – liuliu vetranu sira ne’ebe involve iha “hadau-malu” projeitu oin-oin husi governu, tun ba baze hela ba baze hodi organiza massa atu halo manifestasaun.  

Asaun organiza baze ne’e nudar rezultadu husi enkontru fexada dala-hirak ne’ebe realiza iha Dili, hanesan iha Ministerio Finansa, iha Museun resistencia no iha MNEC (Ministerio Negocio Estrangeiros e Cooperacao).

Tuir informacao katak, brifing hirak ne’e, veteranu sira simu informasaun husi Ministra Finansa Sra. Emilia Pires, Ministro Recurso Naturais Sr. Alfredo Pires, Direitor ANP (Autoridade Nacional de Petroleo) Sr. Gualdino nomos foin dadauk iha MNEC ne’e Sr. Xanana Gusmao rasik mak koalia.

Informasaun ho tendensia ajitasaun ne’ebe veteranu sira simu ne’e konsidera inimigu sira agora domina iha tribunal ne’ebe deside Estado Timor-Leste lakon hela deit iha kazu julgamentu hasoru kompanhia mina sira, no inimigu sira ne’e inventa oin-oin hodi akuza lideransa Timorense sira nudar koruptor.

Tuir observasaun, agora dadauk veteranu balu tun ona ba Baucau, Lospalos, Viqueque, Ainaro, Aileu hodi ajita joven no populasaun sira atu mai halo manifestasaun kontra tribunal.

Tuir estudante universitariu UNTL ida ho inisial OP lamenta katak veteranu sira nian movimentu ne’e. “Maun boot sira ne’e, kok bele munu-matak deit ba manobra politika ne’e no ba sakrifika a’an tan ba ema koruptor sira”, dehan OP.

Estudante ne’e mos informa katak ema sira ne’ebe fo briefing ne’e iha Conflic of interest hotu. Problema ne’ebe Estado Timor-Leste infrenta iha Tribunal no agora atu lakon tan iha Tribunal Singapura ne’e nudar faillansu husi Ministra Emilia Pires nebe kontratu Asesor Boby Boyle nebe agora kapturadu ona iha EUA, no faillansu husi Ministro Alfredo Pires ne’ebe kontratu advogadu Amerikanu ne’ebe la hatene defende kazu ho didiak, nune mos Sr. Gualdino ne’ebe la servisu diak atu kobra taxa ba kompanhia sira.

“Kok, mau-mau nya, veteranu sira ba sakrifika a’an dala-ida tan ba ema inkompetenti no koruptor sira?”, OP kestiona.

.