12 Setembru Tribunál Julga Eis Ministru Cancio

.

Jornal Independente - 04 Setembru 2014

Díli - Iha fulan Setembru ho Novembru tinan ne'e. Tribunál Distritu Díli (TDD) sei halo julgamentu ba kazu eis Ministru Edukasaun João Cancio Freitas no Ministra Finansas (MF), Emília Pires.

Offisial justisa ida iha Tribunál Distritu Díli (TDD) hatete, Tribunál tau ona ajenda ba arguidu eis Ministru Edukasaun João Cancio Freitas iha loron 12 fulan Setembru tinan 2014, iha tuku 9:30 oras Timor-Leste.

Aleinde ne'e, Tribunál mós prepara ona ajenda sei halo julgamentu ba arguida Emilia Pires atuál Ministra Finansas, iha loron 27 fulan Novembru tinan ida ne'e.

"TDD liu husi juis ne'ebé kaer prosesu ne'e tau ona ajenda iha Setembru loron 12 no loron 27 Novembru, atu kontinua halo julgamentu ba arguida Emília Pires no arguido João Cancio Freitas," hatete offisial Justisa iha Tribunál Distritu Díli, ne'ebé lakoi fó sai naran ne'e ba jornalista sira iha Tribunál, horiseik,

Tuir nia dehan, arguidu Cancio no arguisa Emilia deskonfia involve iha kazu krime Não Partisipasaun Ekonomiku.

Julgamentu ba kazu não partisipasaun ne'ebé involve husi eis Ministru Edukasaun sei prezidi husi juis kolektivu Julio Gantes, Jose Maria de Araujo no Francisca Martis, Ministériu Publiku (MP), reprejenta husi Prokurador Gloria Alves no arguidu hetan asistensia kompostu husi Defensor Públiku Manuel Sarmento, Advogado privadu José Guterres no Arlindo Dias.

Iha fatin hanesan, juis ne'ebé atu prezidi kazu arguida Emília Pires, Juis Administradór Distritu Díli (TDD) Duarte Tilman dehan, Tribunál iha regras distribuisaun, bainhira sira halo tiha kappa ka kazu Emilia nian, fó kompetensia ba juis administradór sira halo distribuisaun.

Nia dehan, distribuisaun ne'e mós la'os loron-loron. Distribuisaun tuir Kodigu Processual ne'e halo de'it iha Segunda ho Kinta lokraik.

"Prosesu Emilia ho Madalena Tribunál sei halo distribuisaun ba juiz ne'ebé mak atu klaer prosesu ne'e atu hala'o julgamentu ka hapara de'it prosesu ne'e," tenik nia.

Nia esplika, atu hapara prosesu julgamentu ne'e tanba haree fali ba akuzasaun laiha fundamentu faktus ne'e la konstitu ho krime la lori arguida sira ba iha kondenasaunm no artigu sira ne'ebé tau la han malu ho faktus iha akuzasaun," hateten Tilman.

.