Rekoñese Mal-administrasaun Buras, Xanana husu IJE labele "Dukur"

.

Foto, Facebook

Jornal Independente - 07 Agostu 2014

Díli - Primeiru Ministru Kay Rala Xanana Gusmão husu ba Inspetór Jeral Estadu (IJE) atu matan moris hodi kontrola mal-administrasaun ne'ebé mosu iha instituisaun estadu.

PM Xanana husu atu IJE koopera ho Komisaun Funsaun Públiku (KFP) hodi hare kazu hirak ne'ebé mosu.

Bainhira kazu ruma mosu iha ares disiplina, Xanana dehan, entrega ba KFP, no ba kazu mal-administrasaun ne'ebé relasiona ho indikasaun korrupsaun tenke investiga no haruka prosesu tuir lei.

"Ha'u husu ba IJE atu haree problema mal-administrasaun sira ne'ebé mosu hodi koopera ho KPF par haree servisu sira ne'e bele lao ho boa-governasaun," dehan PM Xanana bainhira lidera enkontru ho Ministru no Diretór sira iha Sentru Konvensaun Díli, Kuarta (06/08).

Xanana dehan, IJE no  KFP hala'o knaar importante tebes atu kontrola servisu administrasaun estadu bele la'o di'ak no la'o disiplina.

Xanana rekoiñese durante ne'e iha funsionariu barak sei tama servisu tuir sira nia hakarak, tanba laiha regras disiplina ne'ebé forti atu fó sansaun ba funsionariu sira ne'ebé servisu la tuir oras nó disiplina.

Entretantu, Prezidente KPF, Liborio Pereira dehan, mensajen PM Xanana atu alerta servisu KPF nian hodi ativu hala'o nia misaun kontrolo ba servisu iha instituisaun estadu tomak.

Liborio dehan, durante ne'e KPF mós tau funsionariu balun, no balun ne'ebé servisu la didiplina hetan mós sansaun husi KFP.

.