Prezidente Repúblika dehan kombate pobreza no dezenvolvimentu maka nu’udar prioridade nasaun

.

Foto de, Presidência da República de Timor-Leste, Facebook.

SAPO TL ho Lusa - 21 de Agosto de 2014

Prezidente Repúblika Taur Matan Ruak haktuir katak buat ne’ebé sai hanesan prioridade Estadu nian maka kombate pobreza no kria dezenvolvimentu ekonomia atu nune’e ema hothotu no nasaun bele forte liu tan.

 “Ita halo progresu barak desde independénsia, maibé ita alkansa de’it parte balun, somente ita-ninia objetivu nasionál no nesisdade nasaun nian. Agora, prioridade Nasaun nian maka dezenvolve ekonomia, hapara pobreza no halo povu sai forte liu tan – iha nasaun ida ne’ebé prósperu tebes”, dehan xefe Estadu. 

Lia hirak nee Taur Matan Ruak haktuir iha serimónia selebrasaun ba 39º aniversáriu hosi Falintil (Forças Armadas da Libertação e Independência de Timor-Leste) ne’ebé depois transforma ba forsa regulár ida. 

Tuir prezidente atu dezenvolve ekonomia presija investe iha “rikeza nasionál ho prudénsia no sabedoria”, dezenvolve setór produtivu, valoriza rekursu nasionál no “agrikultór” no “halo atu Timor-Leste labele depende de’it ba importasaun hosi rai liur”. 

 “Dezenvolve ekonomia maka kria infraestrutura nasionál ho kualidade. Ajuda komunidade lokál sira produz ai-haan barak liu tan no lori sira-ninia produsaun ba merkadu”, dehan Taur Matan Ruak, eis-komandante Falintil. 

Tuir Prezidente, iha tempu hanesan presija mós investe iha dezenvolvimentu sosiál liu hosi asesu kuidadu saúde, bee-mos no eletrisidade ba populasaun hotu no hamoos aldeia no suku. 

 “Dezenvolve sosiedade hanesan hasa’e kualidade edukasaun no harii eskola di’ak iha aledia no suku hotu. Buat hirak ne’e maka hanesan misaun foun ida ne’ebé ita-ninia povu presija hetan”, dehan Matan Ruak hodi hatutan tan katak presija “tau interese nasaun no ema hotu nian aas duke interese individuál”. 

Ba militár sira, xefe Estadu fó hanoin hikas katak sira maka elementu “hosi instituisaun Estadu ida ne’ebé antigu liu”, Falintil hahú kria iha “situasaun emerjénsia nasionál grave” no ne’ebé empeñu no rigor hodi hala’o sira-ninia misaun ho forma atu kontribui no halo parte iha dezenolvimentu nasionál. 

 “Nasaun husu ba militár sira atu aperfeisoa, kbit operasionál no profisionalismu. Profisionalismu siknifika mós disiplina. Siknifika rigor iha komportamentu militár nian. 

Halo parte iha misaun ruma ne’ebé nasaun husu ba sira, Falintil-FDTL husu ba militár sira-ninia disiplina, profisionalismu no rigór”, dehan Taur Matan Ruak. 

.