Povu Labele Preokupa Demais ho Pensaun Vitalísia

.

 Timor Post - 05 Agostu 2014

Díli - Xefe bancada Congresso Nasionál Rekonstrusaun Timor Leste (CNRT), Natalino dos Santos hatete, CNRT apoiu halo revizaun ba lei vitalísia maibé deputadu ne'e husu ba publiku atu labele preokupa demais tanba lei ne'e rasik iha ona meja Parlamentu Nasionál.

"Hau hatete tiha ona katak iha ona draft hosi bankada PD nian hatama ona ba meja maibé seidauk baixa komissaun, maibé ita bo'ot sira hakarak tuir nafatin. Tanba ne'e husu ba ita bo'ot sira hakarak tuir nafatin. Tanba ne'e husu ba ita bo'ot sira labele preokupa hein de'it, afirmasaun CNRT nian klaru hein para halo alterasaun ba lei pennsaun vitalísia. Tanba ne'e partidu CNRT apoiu total ba revizaun lei," Xefe bankada CNRT, Natalino dos Santos hatete ba jornalista sira (4/8) iha PN.

Vise Prezidente Komisaun A ne'ebé trata asuntu Konstituisaun no Anti Korupsaun afirma katak, durante ne'e seidauk halo diskusaun tanba proposta lei alterasaun sei iha meja leten Parlamentu Nasionál.

Purtantu deputadi Antoninho Bianco hosi bankada FRETILIN afirma katak, agora dadaun deputadu sira halo hela negosiasaun ba malu entre opozisaun no bloku koligasaun para halo revizaun ba lei vitalísia ne'ebé mak durante ne'e hetan protestu hosi sosiedade sivil no akademika sira.

"Ami bankada FRETILIN desde tempu Aliansa Maioria Parlamentar foti ona inisiativa maibé momento ne'eba deputadu sira hosi bankada CNRT no PD lakohi preokupa, maibé ami fiar katak ohin loron ho postura politika foun bele halo revizaun ba lei pensaun vitalísia," deputadu Bianco hatete.

Nia dehan, tanba ohin loron TL sei depende 95% ba iha rekursu minerais no gas hosi tasi laran, tanba ne'e importante atu bele halo redusaun para bele ekilibriu nune'e orsamentu bele apoiu ba halo dezenvolvimentu.

Purtantu antes ne'e xefe bankada PD, deputada Maria Lourdes deklara ofisialmente katak sei hato'o proposta ba iha meja Parlamentu Nasionál para halo revizaun no proposta ne'e rasik hetan apoiu maximu hosi Prezidente Repúblika.

Maibé tuir Prezidente Parlamentu Nasionál hosi partidu CNRT antes ne'e hatete, katak lei refere seidauk tama iha prioridade atu halo revizaun, tanba tuir reprezentante povu ne'e katak pensaun ne'ebé mak hetan atu bele garante nafatin eis titulares sira. (uly)

.