PM Xanana: Tempu Besik Sei Fó Sai Lista Remodelasaun

.

Jornal Independente - 25  Agostu 2014

Díli - Primeiru Ministru Kay Rala Xanana Gusmão hakerek tiha ona konseitu ba lista membru Governu na'in 55 ne'ebé makasei tama ba remodelasaun no re-estruturasaun.

Tuir Xefi Governu dehan, lista ne'e sei hala'o analiza klean no iha tempu besik sei fó sai ba públiku.

Tan ne'e, nia husu públiku inklui media nasionál sira atu labele espekula arbiru informasaun la loloos ba públiku hodi hatauk membru Governu sira ne'ebé naran sei tama lista mean remodelasaun ka reestruturasaun.

"Imi jornalista ne'e lalika kahur arbiru lai informasaun sira ne'e, too tempu lai mak fó sai," dehan Xanana hosi hatan pergunta jornalista sira kona ba lista membru Governu ne'ebé sei hetan remodelasaun, bainhira halo vizita ba GAM-MHS Aviasaun hanesan Kompañia Joint Venture entre Timor GAP ho MSH Berhad Malasya Dili, Kinta (21/8).

Komandante de luta ne'e husu ba jornalistas sira atu kalma hodi fó tempo ba nia atu finaliza lista remodelasaun ne'e.

Kestaun remodelasaun, PM Xanana rasik konsulta ona ho Prezidente Repúblika, Taur Matan Ruak, Bispo Dioseze Díli, Dom Ricardo da Silva inklui amigu politiku balun.

Antes ne'e, iha konferensia estra-ordinariu, Xanana promete ba nia membru kuadru partidu CNRT tomak atu halo remodelasaun ba servisu membru Governu sira inklui membru sira husi CNRT nian hotu.

Parte seluk, eis Prezidente Repúblika, José Ramos Horta, eis Primeiru Ministru Mari Alkatiri no eis Prezidente Parlamentu Nasionál, Francisco Guterres (Lu-Olo) aseita planu Xanana halo remodelasaun ne'e. Tanba tuir sira katak, membru Governu sira durante ne'e la servisu efisiente.

Iha parte seluk, komunidade sira mós hein hela planu remodelasaun ne'e bele atende povu nia halerik di'ak liu tan.

Aliende ne'e, tuir Diretor Ezekutivu Asosiasaun Yayasan HAK, Manuel Monteiro hatete, Primeiru Ministru (PM) tenke halo remodelasaun, tanba PM rasik halo promesa ona ba públiku ne'ebé ema hotu hatene.

"Povu oras ne'e hein remodelasaun ne'ebé mak Primeiru Ministru Kay Rala Xanana Gusmão promesa bá públiku," dehan Manuel Monteiru ba jornalista sira, iha Salaul Delta Nova wainhira partisipa iha Seminariu ba dalarua Polisia Komunitari, foin lalais ne'e.

.