Pesoal BOP ho Armas Sobu Festa iha Santa Cruz

.

Jornal Independente - 26 Agostu 2014

Komunidade sira hamutuk ho Joventude Rezistensia Loriku Aswain no Veteranus husu ba Polisia Nasionál Timor-Leste atu foti medidas hasoru pesoal Batallaun Orden Públika (BOP) ne'ebé halo ataka ho armamentu ba festa serimonia aniversariu ida iha Bairru Santa Kruz.

Kazu ne'e akontese iha loron 15 to'o 16 iha Bairru Santa Kruz, Aldeia Donoge, Suku Santa Kruz, Sub-distritu Nain Feto, Distrito de Díli.

Iha ataka ne'e, pesoal BOP tebe Calistro Lake Guteres ne'ebé rezulta vitima hetan hakanek iha ulun no kostoleta (ruin sorin), inklui Komandante Eskuadra Díli, Joaquim ne'ebé partisipa serimonia ne'e hetan mós kanek todan.

Pesoal BOP ho inisial RCR mai festa ho kalsa badak, hafoin nia fila fali ba hatais farda ho armas kompletu mai festa hodi hemu, dansa no kanta.

Iha tuku 1 madrogada mosu insidente kiik, tan ne'e Task Force Distritu Díli mai hakalma no laiha ona problema.

Maibé hafoin Task Force fila, derepente Polísia husi Unidade BOP mai ho armamentu kompletu hodi halo tiru razadas no hatudu brutalismu hasoru komunidade ne'ebé mak mai partisipa iha serimonia ne'e.

Iha akontesimentu ne'e, polisia feto ida ho inisial AN ho diviza Asistente Inspetór husi Departamentu Investigasaun Kriminal Distritu Dili hakilar dehan,"Kaer no baku forsa vinte-vinte sira".

Responsável Komunidade Santa Kruz, Lito Rambo liu husi Konferensia Imprensa lamenta asaun brutalismu ne'ebé pesoal BOP hatudu no liafuan ne'ebé pesoal SIK fó sai.

"Ami rezeita liafuan sira ne'ebé nia substansia bele sobu estabilidade nasionál, tanba impaktu husi brutalizmu oknum Unidade Batallaun Orden Públiku nian halo komunidade paniku no trauma, tanba tiru razadas agresaun ne'e halo komunidade lembra fali insidente 12 Novembru 1991 ne'ebé mak halo joven barak mate iha fatin ne'e," dehan Lito iha Bairru Santa Kruz, horiseik.

Tan ne'e komunidade sira husu ba Komisaun B, Parlamentu Nasionál ne'ebé trata Asuntu Defeza no Seguransa, no Ministériu Defeza no Seguransa atu foti medidas rigorozu ba ayitude brutalismu, bandalizmu ne'ebé oknum PNTL hatudu.

Sira husu mós ba pesoal husi Departamentu Investigasaun Kriminal atu klarifika liafuan ne'ebé nia hasai.

.