MP Besik Finaliza Kazu Mauk Moruk

,

Timor Post - 01 Agostu 2014

Díli - Prokuradór Jerál da Repúblika (PJR), José da Costa Ximenes informa katak, oras ne'e Ministeriu Publiku (MP) besik finaliza ona estuda kazu grupu Konselu Revolusaun Maubere (KRM), ne'ebé lidera hosi eis gerileiru Paulino Gama alias Mauk Moruk.

Tribunál Distritál Díli iha Sábadu (15/03/2014) deside aplika pena prizaun preventiva ba suspeitu aktuál Koordenadór Konsellu Revolusaun Maubere (KRM) Paulino Gama "Mauk Moruk" ho komandante Labarik.

Maske la fó data fiksu PJR José Ximenes dehan katak prosesu grupu KRM, Ministériu Publiku (MP) presiza tempu fulan 6 to'o tinan ida atu estuda evidensia sira ne'ebé polísia rekolla, hafoin bele halo akuzasaun tuir lei.

"Prosesu estudu kazu Mauk Moruk la'o hela, Hein de'it besik finaliza ona," Procuradór Jerál Repúblika, José Costa Ximenes hatán ba jornalista sira iha Salaun Delta Nova, Díli, Kinta (31/7).

Tuir lei, aplikasaun pena prizaun preventiva fulan neen, másimu tinan ida. Agora besik fulan haat ho balun ona Mauk Moruk hela iha prizaun Bekora hodu hein rezultadu investigasaun hosi Ministériu Públiku.

Portantu, Tribunal aplika pena prizaun preventivu ba suspeitu na'in rua involve diretamente iha krime uzu uniforme públiku ne'ebé previstu tuir lei Kódigu Prosesu Penál artigu 188, 194, 195 no 202.

Entretantu, Jurista Manuel Tilman konsidera Paulino Gama Mauk Moruk to'o oras ne'e la'os kondenadu, tanba seidauk hetan desizaun tránzitu injulgadu hosi tribunál.

Tilman esplika, tuir Konstituisaun RDTL katak, ema ida bele hetan kondenasaun kuandu iha ona sentensa liu tiha ona sentensa tranzitadu injulgadu. Kuandu hanesan ne'e maka Mauk Moruk ne'e kondenadu tiha ona, maibé oras ne'e dadauk bolu dehan prizaun preventiva de'it atu fasilita prosesu investigasaun. Signifika kuandu polísia sira atu halo investigasaun la presiza lakon tempu ba buka iha Baucau ne'ebá, maibé ba de'it prizaun Becora.

"Razaun aplika prizaun preventiva ba ema ruma, tanba ita tauk ema ne'e halai ba fatin seluk no mós labele provoka povu atu bele halo revolusaun," hatete Manuel Tilman ba Timor Post iha nia serbisu fatin.

Nia hatutan, atu liberta Mauk Moruk hosi prizaun preventiva ne'e depende ba nia advogado rasik atu oinsá bele esplika ba Tribunál katak, nia kliente sei la halo tan ona revolusaun, nasaun kalma tiha ona no sei la halai ba rai liur.

"Entaun bele aplika de'it Termo Identidade de Rezidénsia (TIR) ba nia hanesan Angela Freitas no António Aítahan Matak hodi hein halo julgamentu ba sira katak kulpadu ka la'e," Tilman esplika. (gim)

.