Moras ISPA Domina Sentru Saúde Vera Kruz

.

Jornal Independente - 13 Agostu 2014

Díli- Iha fulan Jullu to'o Agostu tinan ne'e Sentru Saúde Vera Kruz rejista númeru pasiente ho Ispa aas liu ho nia volume porsentu 50.

Diretora Sentru Saúde, Dulce Pinto Tilman hatete, hahú fulan Jullu to'o Agostu tinan ne'e nia parte rejistu moras Ispa mak domina.

Nia dehan, kada loron pasiente ne'ebé mai rezistu na'in 200 too na'in 250.

"Moras Ispa ne'e maioria, 50 porsentu, ne'e sempre kada fulan, ne'e rezistu 50 porsentu, ne'e nia (Ispa) mak aas liu ona," dehan diretora ne'e ba Independente iha ninia knaar fatin Kaikoli, horiseik.

Aleinde moras ne'e, Sentru saude ne'e rezistu mós moras sira seluk hanesan tensaun, rematismu no moras kulit.

Kuandu pasiente ne'ebé mak presija atu halo observasaun ba sira nia kondisaun saúde, sentru ne'e sei haruka baixa hodi halo observasaun ba pasiente ne'e durante loron tolu ka haat.

Total pasiente ne'ebé baixa iha Sentru ne'e iha fulan Jullu hamutuk na'in 53.

Aleinde moras, Sentru ne'e mos atende inan isin rua ne'ebé partu.

Iha fulan Jullu sentru saude konsege atende inan isin rua ne'ebé hamutuk 63, no iha kazu haat (4) mak sira refere fali ba Ospital Nasionál tanba labele partus normal, presiza halo operasaun.

Iha fulan Agostu, nia dehan, inan isin rua hamutuk 20 mak partu iha Sentru Saude ne'e.

.