ME Sei Foti Medidas ba Finalista iha Cuba

.

Timor Post - 26 Agostu 2014

Díli - Diretór Jerál Ministériu  Edukasaun, Antoninho Pires, ME sei buka hatene estudante medisina UNTL ne'ebé ba estudu iha Cuba ramata ona sira nia estudu maibé halimar de'it iha Cuba, se bainhira informasaun ne'e los maka ME sei foti medidas.

"Ami hakfodak ho novidade ne'e maske Universidade Nasonál Timor Lorosae (UNTL) ne'e servisu autonomu, maibé ami sei kontaktu ho sira, hodi hatene lolos novidade ne'e. Karik tebes ministeriu sei hola medidas," hatete Antoninho iha Vila Verde, tersa (26/08).

Entretantu tuir novidade ne'ebé diariu ne'e asesu katak, bolseru finalista sira ne'ebé remata ona estudu iha area medisina, mais to'o oras seidauk fila mai Timor-Leste no kontinua halimar iha Cuba.

Hahú agora ba oin, hatutan nia, governu sei kontinua identifika novidade ne'ebé oras ne'e espalha ona iha públiku los duni ou la'e. Bainhira identifika ona, katak tebes, Ministériu sei hola medidas ruma. Importante maka agora Ministériu sei husu klarifikasaun hosi UNTL.

"Durante Ministériu Edukasaun liu hosi ensinu superior sempre kontaktu UNTL, mais ba assuntu ne'e seidauk konfirma, no parte UNTL mós seidauk pasa novidade sobre ne'e ba Ministériu," dehan nia.

Nia haktuir Bolseiru Medisina ne'ebé durante ne'e estudu Cuba nia progressu maka agora governu Timor hetan ona doutor no doutora hamutuk 700, ne'ebé maka balun oras ne'e hala'o ona serbisu iha klinica no sentru saude iha Timor laran (max)

.