La Kompriende Portugues, Profesora Baku Estudante To'o Hasan Bubu

.

 Jornal Independente - 07 Agostu 2014

Lautém: Profesora ida ho inisial EF husi eskola Ensinu Baziku Filial Númeru III Lospalos, Distritu Lautém, deskonfia baku nia aluna, Agustina Maria, estudante klase 5, tanba ladun kompriende materia testu Portugues.

Profesora ne'e baku Agustina iha sexta (11/07) no inan husi estudante ne'e, Felisberta Assunção, foin hakfodak iha Segunda (14/07), bainhira haree nia oan nia hasan  bubu no labarik ne'e lamenta kona-ba nia tilun ne'ebé moras.

La satisfas ho atetudi preofesora ne'e, durante loron rua nia laran, Segunda (14/07) no Tersa (15/07), Felisberta ba eskola hodi istori malu ho profesora EF.

Ba jornal ne'e, Felisberta konta iha Sesta lokoraik wainhira nia oan fila husi eskola informa katak profesora halo asaun baku ba Agustina, maibé Felisberta dehan iha altura ne'ebá nia oan iha kondisaun di'ak no nia fiar katak ida ne'e hanesan parte husi edukasaun.

Maibe, hafoin loron 3, Felisberta hakfodak haree nia oan nia hasan bubu sai metan no lamenta kona-ba tilun ne'ebé moras.

"Ita baku bele, maibé laos baku to'o bubu i depois labarik nia tilun mós moras hotu tanba ne'e mak ha'u hirus," dehan Felisberta.

Iha fatin ketak, Koordenador Eskola Ensinu Baziku Fiulial nú.III Lospalos, Frederico Pereira rekoñese kazu ne'e.

Tuir nia, parte eskola sei esforsu atu buka solusaun liu husi dalan familiar entre inan-aman alunus ho profesor sira.

Nia dehan, profesora ne'e baku duni nia aluna maibé laos todan.

Maibé hafoin loron 2 inan husi estudante ne'e de repente mosu ho istori malu ho profesora ne'ebé baku nia oan.

Nudar Koordenador Eskola, nia dehan, tenke simu realidade ne'e sai hanesan referensia ida ba profesor tomak katak saida mak akontese ne'e sai sasukat hodi hanorin profesor sira atu hadia aan mia loron aban.

"Ha'u simu, tanba ida ne'e mak realidade, maibé dala barak inan-aman sira seidauk konsensia katak ami professor sira nu'udar mós inan-aman ida ba estudante sira, ne'ebé konserteza saida mak ami halo ne'e ba sira nia di'ak iha futuru, mais ha'u hanoin durante ne'e inan-amn sempre buka de'it mestri sira nia kulpa," dehan nia.

Entretantu Koordenadora Forum Organizasaun Timor-Leste Distritu Lautem, Juliana de Jejus lamenta mós ho hahalok professora ne'e.

Juliana konsidera hahalok ne'e hanesan krime no kontra ona konvensaun direitu labarik nian.

"Ita kuandu liga ba direitu labarik ne'e Kuandu mestri ida mak baku estudante ida konsidera ne'e violensia, ita nia liman kuandu kona ema kanek ka bubu dehan katak krime,"dehan Juliana.

Iha tempu badak, nia dehan, nia parte sei husu Sub-komisaun Justisa no Pas (SCJP) no Ofisial Protesaun Labarik (OPL), inklui Polisia VPU atu bele haree problema ne'e tuir prosesu legal ne'ebé iha.

"Ita hanorin no baku sira ne'e nia tempu liu tiha ona, ita presiza hanorin ho lian mamar, ho metodo oioin ne'ebé ita uza oinsa atu sira bele kompriende, laos ita baku par sira kompriende, satan SD, ha'u hanoin ne'e la di'ak," dehan nia.

.