La Fiar Mina Maran Iha 2030

.

Timor Post - 27 Agostu 2014

Díli - Primeiru Ministru, Kay Rala Xanana Gusmão fiar án mina iha Tasi Timor sei la maran iha tinan 2017 no 2030.

Primeiru Ministru, Kay Rala Xanana Gusmão deklara kestau ne'e, tanba governu aprezenta Orsamentu Jerál Estadu (OJE) 2014 ho montante 1.5 bilioens ba Parlamentu Nasionál, iha fulan Janeiru liu ba.

Maibé reprezentante povu iha uma fukun Parlamentu Nasionál konsidera orsamentu ne'ebé demais sei fó impaktu ba fundu mina-rai iha futuru, tanba tuir analiza balun hatudu katak mina sei maran iha 2030.

Tanba tuir Parlamentu Nasionál nia hanoin katak governu hasai osan husi fundu mina-rai tenke haree ba nesesidades ne'ebé presiza, la'ós hasai osan ho montante bo'ot, maibé ezekusaun la la'o.

"Dalaruma governu aprezenta orsamentu ba Parlamentu, Parlamentu mós tenke kompriende. Ha'u dehan Parlamentu tenke kompriende tanba demokásia nia laran ita koalia dehan katak ahhhh mina atu hotu ona, karik mina atu hotu, governu labele beik atu halo Suplay Base iha Suai, hanoin estabelese refinaria iha Betano no LNG Plan, ne'e katak ita (Timor-Leste) iha," PM Xanana informa ba jornalista sira, iha aeroportu Nicolau Lobato, Kinta (21/08).

Xanana dehan, estabelesimentu mega projetu sira hodi hetan mós osan,atu nune'e bele loke investimentu bo'ot iha Timor-Leste.

Nune'e mós tuir Sosiedade Sivíl, liu hosi ONG Lao Hamutuk fó sai katak mina sei maran iha 2027, tanba kada tinangovernu hasau hela de'it fundu minarai ho montante bo'ot, maibé osan hus setór seluk laiha.

"Ne'ebé dalaruma ita koalia sala, povu hakfodak, mas importante liu ba hot-hotu maka oinsá governu kaer didi'ak osan ida ne'e, mas restu industria hosi osan ne'e importante tebes ba ita nia rain," tenik Xefe Governu.

Ho deklarasaun Parlamentu Nasionál no Sosiedade Sivíl sira fó sai katak mina sei maran iha 2017 no 2030, Primeiru Ministru Kay Rala Xanana Gysmão la fiar ho deklarasaun ne'e.

Tanba tuir Xefe Governu, governu iha hanoin hari'i Suplay Base, refenaria, LNG inklui ZEESM Oe-Cusse atu hatama mós osan. (vas)

.