KPK Identifica Uma Membru Governu

.

Timor Post - 15 Agostu 2014

Díli - Komisi Pemberantas Korupsi (KPK) detekta ona membru governu balun ne'ebé halo uma iha nasaun Indonésia. Maibé KPK seidauk bele halo asaun tanba seidauk iha akordu entre KAK (Komisaun Anti Korupsaun) ho KPK.

Espesialista Edukasaun no Atendementu Públiku KPK Indonézia, Wuryono Prakoso hatete, tanba seidauk iha koperasaun entaun KPK halo intervensaun.

"Ami hosi KPK hatene membru balun halo uma luxu iha Indonézia. Maibé, ami  labele halo buat ruma tanba seidauk iha koperasaun, mais kuandu akordu koperasaun asina ona mak iha tempu besik, ami seu hala'o servisu ida ne'e," Prakoso dehan iha konferensia ne'ébé hala'o iha Business Palm Center, Hudi-Laran, Díli, Kinta (14/08).

Maibé nia dehan, depois KAK ho KPK asina ona akordu tempu besik mak KPK sei husu KAK atu aprejenta prosesu hodi halo intervensaun ba membrus governu sira ne'ebé halo uma iha Indonézia.

Prakoso hatutan, meius ne'ebé KPK sei halo, depois de asina akordu koperasaun mak sei halo prosesu hodi haruka fila koruptór sira ne'ebé halo uma iha nasaun Indonézia. Maibé, KAK tenke aprejenta mos identifikasaun lolos korruptór sira nian.

Kestaun seluk ne'ebé KPK preokupa mak to'o agora, TL seidauk iha lei anti korupsaun hodi prosesa koruptór sira tuir lei ne'ebé vigora iha nasaun TL.

Nia sujere ba Parlamentu Nasionál atu bele deskute no aprova lalais anti korupsaun. Nia dehan tan, KPK mos identifika koruptór balun ne'ebé halai ba Indonézia. Mais nia labele temi naran lolos no nia espera ho koperasaun ne'ebé trasa ona entre parte rua mak KPK sei fasilita hodi lori mai TL.

Entretantu, Komisariu Kak Aderito Pinto Tilman hatete, atu hametin relasaun di'ak entre KAK ho KPK Indonézia tenke sai pririedade primeiru nasaun rua nian iha tempu besik.

Tan ne'e KAK sei asina ho KPK iha tempu badak hodi kombate no prevene korupsaun iha area oi-oin.

"Hanesan akontese iha ita nia le'et, korupsaun akontese liu-hosi meius oi-oin. Entaun dalan ne'ebé di'ak maka ita tenke kombate iha nivel nasionál to'o nivel rejionál mak prevensaun. edukasaun no investigasaun," Tilman hatete liu hosi abertura konferensia.

Aderito hatutan, agora dadaun esforsu serbisu KAK hanesan esforsu nasionál no global. Haree ba vizaun globalizasaun fó ona benefisiu, maibe haree hosi aspektu struktura ne'ebé fasilita transaksaun negosiuno finansiamentu internasinál ba buat sira ne'ebé la fó dalan, hanesan brankeamentu kapitais no hadok-án hosi impostu.

Nia dehan tan, nasaun TL lakohi dezenvolvi ho osan fo'er, entaun di'ak liu prevene agora duque kura. Nia espera ho konferensia ne'e bele fó rezultadu signifikativu hodi ajuda nasaun TL ho RI atu kombate hahalok korupsaun.

"Hahalok sira hanesan ne'e sempre hamosu inisiativa la di'ak ba nasaun dezenvolvidu sira. Rezultadu hosi hahalok sira ne'e hamosu ki'ak barak iha nasaun sira ne'ebé riku mina," nia dehan.

Aderito dehan tan, apoiu ONG sira nian importante tebes iha faze kombate korupsaun iha nasaun TL. Nia espera, ho konferensia ne'e bele rezultadu konfrensip ba organizasaun sívil, no la-sente izola án hasoru korupsaun ne'ebé akontese iha rai laran.

Nune'e mos, Xefe delegasaun KPK, Jhonson Giating hatete, konferensia foun ne'ebé realiza entre nasaun rua hodi aprende oinsá atu bele kombate korupsaun iha ida-idak nasaun.

Nia espera konferensia ne'e TL bele foti rezultadu di'ak ruma hosi esperiensia ne'ebé KPK husik hela durante konferensia loron rua.

Oportunidade ne'e Prokuradór Jerál Repúblika, José Ximenes hato'o nia apresiasaun relasiona ba buat ne'ebé mak Komisariu KAK ho nia ekipa sira halo hosi realiza seminariu hamutuk entre KAK ho KPK durante loron rua.

Nia dehan tan, KAK TL iha adjuntu komisariu ne'ebé toma konta ba investigasaun hodi ajuda prokuradória jerál.

"Hau hakarak hatete katak atu kombate no prevene korupsaun uza lei kodigu penal. Maibé iha diferensa investigasaun KAK ho KPK mak balun la-hanesan, ezemplu KAK halo investigasaun ba kazu korupsaun ne'ebé akontese iha instituisaun estadu bele bazeia ba informasaun hosi pesoal ministériu nian," nia dehan tan.

Antes ne'e, PJR José Ximenes deklara ona ba públiku katak Ministériu Públiku identifika membru balun iha aset iha nasaun Indonézia. (myn)

,