KFP Falla Komunika - Bolseirus Indonézia Deskontroladu

.

Timor Post - 16 Agostu 2014

Díli - Liña koordenasaun no komunikasaun entre adidu edukasaun Indonézia no Komusaun Funsaun Públiku (KFP) to'o oras ne'e susar tebes, tanba kada tinan governu haruka finsionáriu Públiku lubuk ida mak ba kontinua sira nia estudu iha Indonézia, maibé to'o oras ne'e adidu edukasaun Indonézia rasik seidauk hatene númeru hira mak oras ne'e estuda hela iha Indonézia.

Adidu Edukasaun Timor-Leste ba Indonezia, Agustinho Almeida Fernandes hatete, durante ne'e susar kontrola bolseiru hosi eskola iha Indonézia, tanba KFP rasik to'o oras ne'e seidauk haruka númeru lolos ba embaixada Timor-Leste iha Indonézia liu-liu ba adidu edukasaun hodi bele fasil halo kontrolu.

"Bolseiru Finsionáriu Públiku ne'ebé governu haruka ba kontinua estudu iha Indonézia barak loos, maibé KFP to'o oras ne'e seidauk iha komunikasaun ho ami. Ami laiha dadus konkretu no susar atu kontrola, tanba dadus ikus ne'ebé ami iha, hamutuk 600 resin. Maibé durante ne'e Ministeriu barak mak ba halo kooperasaun ho Universidade sira iha Indonézia no haruka Funsionáriu Públiku barak mak kontinua sira nia estudu," hatete Agustinho Almeida ba Timor Post iha Dili foin lalais.

Agostinho hatutan, kuandu Funsionáriu Públiku ruma mak ba kontinua sira nia estudu iha Indonézia, KFP tenke informa lalais ba adidu edukasaun hodi bele fasil kontrola, maibé to'o ohin loron KFP rasik la halo saida de'it.

"Hau ba tinan ida ona, maibé observa realidade bolseiru barak mak la liu hosi embaixada Indonézia no ita nia governante sira barak mak ba halo akordu ho universidade Indonézia. Maibé, lafó informasaun mai Embaixada TL ho adidu Edukasaun," konfesa Agostinhu.

Hatan ba preokupasaun ne'e, Prezidente Komisaun Funsaun Públiku (KFP), Líborio Pereira rekoñese duni seidauk informa ba adidu edukasaun tanba desde Institutu Nasionál Administrasaun Públiku (INAP) no KFP harii seidauk halo koordenasaun di'ak ho adidu edukasaun Timor-Leste nian iha Indonézia, maibé Líborio promete sei halo duni koordenasaun iha tempu oin mai, maibé lahatene bainhira, tanba Liborio rasik koalia de'it dehan sei halo. (max)

.