Julgamentu ba MF Emília Pires halo PM Xanana Duvida Kapasidade Tribunál

,

Jornal Independente - 25 Agostu 2014

Díli - Relasiona ho julgamentu ne'ebé sei halo ba Ministra Finansas Emília Pires iha fulan Novembru tinan ne'e, Primeiru Ministru Kay Rala Xanana Gusmão hahú hato'o ninia duvidas ba kapasidade orgaun judisial iha Timor-Leste.

PM Xanana duvida kapasidade Tribunál, tanba haree ba prosesu justisa ne'ebé la'o iha rai laran.

"Ha'u duvida kapasidade, kbi'it ita-nia sira ne'e. Estadu konstrusaun ne'e la'os governu de'it mak sala, maibé ita hotu bele sala. Dala-ruma ha'u kritika ida ne'e dehan ha'u atu defende, laiha", dehan Xanana ba jornalista sira iha Palasiu Prezidensial Nikolau Lobato, Bairru-Pite, Sexta (22/08).

"Ha'u ba nasaun Portugal ko'alia ho Prezidente Tribunál. ha'u temi Lucia Lobato nian, sira dehan, ami iha ne'e abuzu poder halo beibeik ne'e mak dehan abuzu ne'e. Ne'e hau ko'alia ida ne'e," haktuir Xanana.

Xefe Governu dehan, prosesu ba eis Ministra Justisa Lucia Lobato seidauk hotu, tanba instituisaun sira ne'ebé foin la'o iha tinan 10 nia laran.

PM Xanana, nia parte duvida, tanba iha dokumentu balun ne'ebé simu ho lian portugues nia parte ladun kompriende, maibé ho Timor-oan sira ne'ebé komprende lian português ne'ebé tuir de'it juiz no prokuradór sira husi estranjeiru hodi asina de'it.

"Ha'u fiar katak ema barak ema barak ne'ebé agora sai boot ne'ebé la kompriende asina de'it ne'e mak ha'u admira, buat sira ne'e hotu mak atu dehan ba ita laos ita hatun malu, mais atu dehan katak kbi'it ita-nia konstrusaun estadu, ne'e, ita sei estadu frazil," dehan Xanana.

Maibé PM Xanana mós fiar katak, ho situasaun sira ne'e kuandu juíz sira asina dokumentu ruma sira asina ho laran, tanba hatene no komprende situasaun no lalaok dokumentu ne'ebé asina hela.

Xanana mós fiar ba Prokuradór juiz sira iha TL la simu osan husi kompañia boot sira, maibé governu lakohi hatama osan ba iha kofre estadu no lakohi hari'i Autoridade Nasionál Petroleu no Timor GAP.

Tanba iha konstituisaun aplika justisa ba ema hotu hanesan no konstrusaun instituisun hotu-hotu ne'ebé tau matan ba malu atu haree lala'ok durante ne'e.

Maski nune'e iha kazu barak ne'e ne'ebé PM Xanana rasik promete sei aprezenta ba jornalista, tanba iha ona enkontru ne'ebé halo hodi bele haree oinsá aplika justisa ba iha povu sira.

"Dala ruma dehan, ha'u kontra, ha'u hakarak proteje. Ha'u dehan tiha ona bá Tribunál ha'u la tauk, tanba iha Indonézia nia tempu mós ha'u ba iha kadeia nia laran atu liberta rai ne'e," dehan Xanana.

Xanana mós aviza ba instituisaun hotu katak, konstrusaun estadu ne'e ida-idak tenke rekuiñese ninia frakeza to'o iha ne'ebé hodi hadi'ak atu nune'e bele sai di'ak .

"Ha'u konfesa doutoradu sira matenek liu ha'u, hau SMA ne'e ha'u konfesa. Ne'ebé doutoradu sira hatene tiha ona saida mak sira asina ne'e, ha'u hakruk," nia dehan.

"Malae sira juiz no Prokuradór Portugal sira agora ne'e sira fila ba iha Portugal ne'e moris kapas. Ne'ebé labele hanoin katak, ha'u nia kakutak, mós laiha. Labele dehan ha'u defende hela ha'u nia membru sira. Mais nunka haluha katak, ita matan atu haree frakeza iha ne'ebé," hatutan Xanana.

.