Joven 22% Seidauk Asesu Edukasaun

.

Timor Post - 11 Agostu 2014

Díli - Secretáriu Estadu Juventude Desportu (SEJD) Miguel Manetelo informa, nia preokupa ho joven Timor-Leste entre idade 15 ate 24 pursentu 22% oras ne'e seidauk ba edukasaun bainhira governu laiha atensaun lalais bele fó impaktu mós estabilidade nasaun.

"Tuir dadus joven ne'ebé idade tinan 15 to'o 24, iha pursentu 22% maka la asesu ba edukasaun e la-asesu mós ba serbisu, sira ne'e sei hanesan risku bo'ot ba estabilidade," dehan Manetelo ba jornalista iha nia serbisu fatin sesta, (08/08).

Manetelo hatete, atu hamenus problema ida ne'e, la'os de'it reponsabilidade Sekretáriu Estadu Juventude Desportu nian dei't maibé instituisaun tomak liu-liu Sekretáriu Política Formasaun Prodesional e Empregu (SEFOPE) atu haforsa liu tan a formasaun no koperativa ba joven sira.

"Joven sira ne'e maka risku bo'ot ba estabilidade tanba kuandu ema tau bosok ahi, ahi lakan kedas, entaun Governante sira presiza halo serbisu interligadu, tanba ne'e maka iha propasta orsamentu sempre hare'e mós ba orsamentu kapasitasaun joven sira nian," explica Manetelo.

Maske nune'e nia mós hare'e katak durante ne'e formasaun ne'ebé SEFOPE halo oras ne'e mós la'o dadaun no atividade kooperativa la'o dadaun.

Kona ba esforsu SEJD nian maka alende halo koperasaun inter-ministerial, SEJD mós halo hela kpperasaun ho parseiru internasional sira hanesan IAD ho programa prevensaun konflitus, UNICEF ho programa hasa'e abilidade skill ba joven sira nian. (flo).

.