Governu Preve Biloens US$1.3 ba Tinan Fiskál 2015

.

Timor Post - 22 Agostu 2014

Díli - Governu liu hosi Ministériu Finansa lidera nu'udar Komite Revizaun hala'o revizaun orsamentu iha nivel tékniku no nivel politika hodi prepara ba orsamentu fiskál 2015.

Komisaun Revizaun Orsamentu ne'e lidera hosi Vise Primeiru Ministru, Fernando La Sama de Araújo no Vise Ministra Finansas, Santina Viegas Arújo.

"Atu prepara orsamentu ano fiskál 2015 governu deside halo ezersisiu rua, primeiru maka atu halo ezersisiu nivel tékniku, no segundu hala'o ezersisiu iha nivel politíka," Xefe Gabinete Minit´eriu Finansas, Helder Lopez hatete ba jornalista sira iha salaun MF, Kinta (21/08).

Hosi komite revizaun orsamentu iha nivel tékniku deskuti mós kona-ba despezas rekorentes, no despezas ba kapital inklui dezenvolvimentu, Xefe Gabinete MF ne'e katak, komisaun revizaun orsamentu hala'o servisu hahú hosi loron 11 to'o 18 fulan Agostu.

"Nivel tékniku hotu ona, entaun inkontru ohin ne'e halo diskusaun ba proposta orsamentu liña orsamentu ida-idak liu hosi nível polítika. Envelope fiskál ne'ebé maka Konsellu Ministru aprova liu hosi proposta kada minitériu Ne'e maka 1.3 biloens, numeru orsamentu ne'e uza hodi halo diskusaun iha nivel tékniku ho nivel politiku," dehan nia.

Objektivu hosi revizaun ne'e atu koa ka hasai tiha orsamentu ne'ebé aprezenta hosi kada ministériu konsidera la prioridade.

"Ha'u hatete katak wainhira governu deside envelope fiskal 1.3 biloens bazeia ba prinsipiu lima hanesan prinsipiu nasionál, sustentabilidade fiskál, kapasidade ezekusaun, kualidadeorsamentu, no ikus liu maka kapasidade ekonómia hodi absolve despezas agregadu," tenik Xefe Gabinete MF.

Tuir Xefe Gabinete MF ne'e katak, bainhira OJE 2014 ministériu ne'ebé ezekuta laloos, sei koa la'os ati aumenta tuir orientasaun hosi Primeiru Ministru, Kai Rala Xanana Gusmão.

Antes ne'e, Diretór Jerál Orsamentu Estadu, Januario Gama, informa katak, orsamentu $1.3 refere sei prefere ba prioridade importante lima hanesan, primeiru hadia uma laran iha instituisaun estadu, rua hadia rekursu humanu, hadia infra-estruturas baziku li-liu estrada, bee mos, sanimentu, no ikus liu mak hadia prestasaun servisu iha kada Ministériu no oinsá mak bele produsaun agrikula. (vas)

.